ლუკაშენკას თქმით, რამან პრატასევიჩსა და სოფია საპეგას ბელარუსში გაასამართლებენ
ლუკაშენკას თქმით, იმის შესახებ, თუ სად გაიმართება გამოძიება, ის სოჭში ელაპარაკა რუსეთის პრეზიდენტ ვლადიმირ პუტინს. მან დასძინა, რომ მან და პუტინმა ისაუბრეს „ავიაკომპანია Ryanair-ის თვითმფრინავის დაკავებული მგზავრების“ შესახებ, მაგრამ მხოლოდ ცოტა დრო დაუთმეს ამ საკითხს.
ადრე ბელარუსის საგარეო საქმეთა მინისტრმა ვლადიმირ მაკეიმ „კომერსანტისთვის“ მიცემულ ინტერვიუში განაცხადა, რომ სოფია საპეგას ბელარუსში გაასამართლებენ, განაჩენის შემდეგ კი შეიძლება შეიწყალონ ან რუსეთს გადასცენ სასჯელის მოსახდელად. მისი თქმით, სასამართლო შეიძლება მალე გაიმართოს, თუ საკმარისი მასალა მოგროვდება.
პუტინისა და ლუკაშენკას 29 მაისის შეხვედრის შემდეგ პუტინმა რუსეთის საგარეო საქმეთა სამინისტროს დაავალა, ყურადღებით ადევნოს თვალყური საპეგას საქმეს.
სოფია საპეგა 23 მაისს დააკავეს თავის მეგობართან, ბლოგერ რამან პრატასევიჩთან ერთად, რომელიც ბელარუსის მოქალაქეა. ისინი ჩამოსხეს Ryanair-ის რეისიდან, რომელიც ათენიდან ვილნიუსში მიფრინავდა, მაგრამ ბელარუსმა ის აიძულა, მინსკში დამჯდარიყო. ეს მოხდა მას მერე, რაც პილოტებს თვითმფრინავში ბომბის არსებობის შესახებ ინფორმაცია მიაწოდეს ბელარუსის დისპეტჩერებმა. თვითმფრინავის ესკორტისთვის ჰაერში ავიდა სამხედრო გამანადგურებელი.
მედიის თანახმად, საპეგა ბელარუსის სამართალდამცავი ორგანოების მიერ ეჭვმიტანილია სოციალური დაპირისპირების გაღვივებაში, რაც 12 წლით პატიმრობას ითვალისწინებს. მანამდე იტყობინებოდნენ, რომ საპეგა ასევე ეჭვმიტანილია მასობრივი არეულობისა და ჯგუფური მოქმედებების ორგანიზებაში, რომლებიც უხეშად არღვევს საზოგადოებრივ წესრიგს. სასამართლომ მას ორი თვით წინასწარი პატიმრობა მიუსაჯა.
რამან პრატასევიჩი, რომელიც Telegram-ის ოპოზიციური არხი NEXTA-ს ყოფილი მთავარი რედაქტორია, ბელარუსის ხელისუფლებამ შეიყვანა ტერორიზმში ბრალდებული ადამიანების სიაში. მის წინააღმდეგ სისხლის სამართლის საქმეა აღძრულია მინსკში მასობრივი არეულობის ორგანიზებისა და ხელისუფლებისა და მილიციის მიმართ სოციალური დაპირისპირების გაღვივების ბრალდებით. ის ეჭვმიტანილია ასევე სახელმწიფო საიდუმლოს გათქმასა და პრეზიდენტის შეურაცხყოფაში.