ჯო ბაიდენი სამშაბათს ასობით შავკანიანი ამერიკელის სიკვდილის ადგილს მოინახულებს ტალსაში
აშშ-ის პრეზიდენტი ჯო ბაიდენი სამშაბათს მოინახულებს ასობით შავკანიანი ამერიკელის სიკვდილის ადგილს გრინვუდში, ოკლაჰომის შტატის ქალაქ ტალსის რაიონში. დღეს, სისხლისღვრის მეასე წლისთავზე, აქ რასობრივი უთანასწორობის მსხვერპლთ იხსენებენ.
ბაიდენი აშშ-ის პირველი მოქმედი პრეზიდენტია, რომელიც ოფიციალურად ჩავიდა ტალსაში, რათა პატივი მიაგოს დაღუპულ აფრიკელ ამერიკელებს.
როგორც თეთრი სახლი იტყობინება, ვიზიტის მსვლელობისას პრეზიდენტი გამოაცხადებს უთანასწორობის წინააღმდეგ ბრძოლის თაობაზე ახალი ინიციატივის შესახებ. კერძოდ, საქმე ეხება გეგმებს გასაჭირში მყოფ მცირე საწარმოებთან ფედერალური კონტრაქტების გაფართოების თაობაზე. ღატაკი რაიონების განვითარებაზე ათობით მილიარდი დოლარი გამოიყოფა. ხელისუფლებას გადაწყვეტილი აქვს, ახალ ზომებს მიმართოს საბინაო სფეროში დისკრიმინაციის წინააღმდეგ საბრძოლველად.
ორშაბათს ბაიდენი გამოვიდა განცხადებით, რომელშიც ყველა ამერიკელს მოუწოდა, „დაფიქრდნენ ქვეყანაში რასისტული ტერორის ღრმა ფესვების შესახებ და მხარდაჭერა გამოუხატოს სისტემური რასიზმის აღმოფხვრის საქმეს“.
უკანასკნელ წლებში გაიზარდა საზოგადოების ყურადღება ტალსის მოვლენების მიმართ, რაც ათწლეულების განმავლობაში არ ისწავლებოდა ისტორიის გაკვეთილებზე და არ შუქდებოდა ადგილობრივი გაზეთების მიერ. თეთრკანიანმა მოსახლეობამ დაარბია გრინვუდის აფრიკულ ამერიკელთა თემი, მოკლეს 300-მდე შავკანიანი და დაარბიეს სახლები და საწარმოები მას შემდეგ, რაც თეთრკანიანმა ქალმა შავკანიანი მამაკაცი თავდასხმაში დაადანაშაულა. მისი ბრალეულობა არ დამტკიცებულა.