ცხინვალში განიხილავენ დამასკოში დე ფაქტო საელჩოს გახსნის საკითხს
ოკუპირებული რეგიონის ე.წ საპარლამენტო დელეგაცია სპიკერის ხელმძღვანელობით ოფიციალური ვიზიტით 24 მაისს დამასკოში ჩავიდა, სადაც მონაწილეობა მიიღო 26 მაისს ჩატარებულ საპრეზიდენტო არჩევნებში, როგორც საერთაშორისო დამკვირვებლებმა. როგორც ტადტაევმა განაცხადა, ვიზიტის დროს მათ შეხვედრა ჰქონდათ სირიის სახალხო საბჭოს დეპუტატებთან, რომლებთანაც განიხილეს ორი ქვეყნის პარლამენტარებს შორის შემდგომი თანამშრომლობა.
„ჩვენ შევხვდით სირიის არაბული რესპუბლიკის სახალხო საბჭოს თავმჯდომარეს. ჩვენ გვქონდა საათნახევარიანი საუბარი, სადაც გავცვალეთ ჩვენი თანამშრომლობის სურვილი და ხედვა. სირიის სახალხო საბჭომ სამხრეთ ოსეთის პარლამენტთან ურთიერთთანამშრომლობის კომიტეტი შექმნა. უახლოეს მომავალში, ჩვენ ასევე გვინდა პარლამენტის სხდომაზე სირიის სახალხო საბჭოსთან თანამშრომლობის კომისიის შექმნის საკითხი გავიტანოთ", - თქვა ტადტაევმა.
სპიკერის თქმით, მათ განიხილეს პოლიტიკური და სოციალური ურთიერთთანამშრომლობის საკითხები. დე ფაქტო პარლამენტის ხელმძღვანელმა ასევე აღნიშნა, რომ მათ სირიელი კოლეგები მიიწვიეს სამხრეთ ოსეთში 20 სექტემბერს ე.წ დამოუკიდებლობის დღესთან დაკავშირებით და მათ სიამოვნებით მიიღეს მოწვევა. გარდა ამისა, ტადტაევმა აღნიშნა, რომ დამასკოში სამხრეთ ოსეთის საელჩო გაიხსნება.
„დარწმუნებული ვარ, რომ უახლოეს მომავალში ჩვენი ქვეყნის ხელმძღვანელობა და სირიის ხელმძღვანელობა ერთობლივად გახსნიან სამხრეთ ოსეთის რესპუბლიკის საელჩოს სირიის არაბულ რესპუბლიკაში ”, - აღნიშნა სპიკერმა.
2018 წლის 29 მაისს სირიის არაბთა რესპუბლიკამ აღიარა საქართველოს ოკუპირებული რეგიონების - აფხაზეთისა და ცხინვალის რეგიონის ე.წ. „დამოუკიდებლობა“. თუ გავითვალისწინებთ იმ ფაქტს, რომ ვანუატუმ და ტუვალუმ საკუთარი აღიარებები უკან წაიღეს, სირია იქცა მეხუთე ქვეყნად (რუსეთის, ნიკარაგუის, ვენესუელისა და ნაურუს შემდეგ), რომელიც ცნობს ოკუპირებული რეგიონების ე.წ. „დამოუკიდებლობას“. საქართველოს საგარეო საქმეთა სამინისტრომ იმავე დღეს, 29 მაისს, დაგმო სირიის ხელისუფლების ეს გადაწყვეტილება. ამასთან, საგარეო საქმეთა სამინისტრომ დაიწყო პროცედურები სირიის არაბთა რესპუბლიკასთან დიპლომატიური ურთიერთობების გაწყვეტის მიზნით და მოუწოდა საერთაშორისო თანამეგობრობას დაეგმო რუსეთის ფედერაციისა და ასადის რეჟიმის ქმედებები.