Қирғизистон мустақиллигининг 27 йиллигини нишонламоқда

Қирғизистонда Мустақиллик кунининг 27 йиллиги нишонланмоқда. Ушбу санага бағишланган асосий тадбирлар Бишкекдаги “Ала-Тоо” марказий майдонида бўлиб ўтаяпти. Тадбирда мамлакат президенти Сооронбай Жээнбеков табрик нутқи билан чиқиш қилди.

Бундан ташқари, тантанали маросимга собиқ президентлар, депутатлар, ҳукумат аъзолари, маданият арбоблари, спортчилар ва бошқалар таклиф этилган.

Байрам тадбирлари, шунингдек, республиканинг барча вилоятларида бўлиб ўтаяпти.

Маълумот учун, Қирғизистон 1991 йилда мустақилликка эришган. Унинг биринчи президенти Аскар Акаев ҳокимият тепасида 15 йил ўтирган ва 2005 йил 24 март куни ағдарилган. Унинг ўрнига 2005 йилда келган президент Курманбек Бакиев ҳам худди шу йўл билан ҳокимиятдан четлаштирилган.

2010 йил апрель воқеаларидан кейин Муваққат ҳукуматни бошқарган Роза Отунбаева ўша йил 27 июнь куни бўлиб ўтган умумхалқ референдумида давлат раҳбари этиб сайланган. Бир йил ўтиб ҳокимиятни президент Алмазбек Атамбаевга берган. У эса давлатни 2017 йилга қадар бошқарган. Шу йилнинг октябрь ойида Сооронбай Жээнбеков Қирғизистон президенти этиб сайланди.

Сооранбай Жээнбеков ўзининг табрик нутқида озодлик ўз-ўзидан берилмаслиги, у доимий кураш натижасида қўлга киритилишини таъкидлаб ўтди. “Аждодларимизнинг ушбу буюк кунгача босиб ўтган йўли узун, машаққатли, фожеа ва азоб-уқубатларга тўла бўлган. Улар асрлар давомида узоқ кутилган озодлик учун кураш олиб боришган. Халқнинг не-не ўғил-қизлари мустақилликка эришиш йўлида ўз жонини қурбон қилмади”, - деди у.