СССР халқ артисти Иосиф Кобзон вафот этди
Москвада 30 август куни СССР халқ артисти Иосиф Кобзон 81 ёшида вафот этди. У саҳнада 1958 йилдан бошлаб шу кунгача бўлган 60 йил давомида қўшиқ куйлаб келди.
"Интерфакс" агентлигининг хабар беришича, 2005 йилда Кобзонда саратон касаллиги аниқланган. Сўнгги ойларда унинг саломатлиги ёмонлашган. У 26 июлда касалхонага ётқизилган ва 7 августда уйда даволанишга чиқарилган эди.
Машхур қўшиқчи бўлган Иосиф Кобзон 1990 йилда СССР Олий Совети депутати бўлган. 1997 йилдан бери у Россия Думаси депутати бўлиб келган.
2014 йилнинг мартида Иосиф Кобзон Россия Президенти Путиннинг Қримдаги сиёсатини қўллаб-қувватлаган. Бир неча маротаба Украинанинг айримачи Донецк ва Луганск вилоятларида бўлиб, очиқ-ошкора сепаратчиларни қўллашини эълон қилган.
Европа Иттифоқи, АҚШ, Канада ва Украина Кобзонни санкция жорий этилган шахслар рўйхатига киритган ва ўз мамлакатлари ҳудудига киришини тақиқлаган.