ՌԴ բանկերին զգուշացրել են ՀՀ-ից կասկածելի գործարքների ռիսկի մասին
ՌԴ Կենտրոնական բանկը զգուշացրել է ռուսաստանյան բանկերին կասկածելի գործարքների հնարավորության մասին՝ կապված Հայաստանից եւ Ղրղզըստանից ֆիկտիվ ներմուծման հետ:
Ինչպես հաղորդում է «Վեդոմոստի»-ն, այս մասին ասված է ՌԴ ԿԲ-ի նախագահի տեղակալ Դմիտրի Սկոբելկինի՝ բանկերին ուղղված նամակում, որը հրապարակվել է հունիսի 21-ին ԿԲ տեղեկագրում:
«Հայաստանի եւ Ղրղզըստանի՝ ԵԱՏՄ-ին անդամակցությունն առաջացրել է փողերի անօրինական դուրսբերման «բելառուսա-ղազախական սխեմա»-ի տարածման, ինչպես նաեւ այս երկրներից դեպի Ռուսաստան ապրանքների ներմուծում ենթադրող գործարքների հետ կապված հնարավոր ռիսկեր»,- ասված է փաստաթղթում:
Նամակը հրապարակվել է ռուսաստանյան բանկերի՝ փողերի լվացման եւ ահաբեկչության ֆինանսավորման մեջ ներգրավվման հնարավոր ռիսկերի նվազեցման նպատակով:
ԿԲ-ում նշել են, որ անբարեխիղճ հաճախորդները կարող են ներմուծման վճարման ներքո իրականացնել կասկածելի գործարքներ՝ դրանց համար ներկայացնելով համապատասխան փաստաթղթեր, որոնք, սակայն, պետական մարմինների տվյալների բազայում բացակայում են:
Ռուսաստանի ԿԲ-ն կոչ է անում հատուկ ուշադրություն դարձնել այն գործարքներին, որոնց դեպքում ՀՀ-ից եւ Ղրղզըստանից ներմուծված ապրանքների դիմաց վճարվող գումարները փոխանցվում են այս երկրներից դուրս գտնվող՝ ՌԴ ռեզիդենտ չհանդիսացող անձանց:
«Նման հատկանիշներով գործարքները կարող են ճանաչվել կասկածելի, իսկ կասկածների հաստատումից հետո գործարքը կդադարեցվի, եւ հաշիվը կփակվի»,- ասված է տեղեկագրում:
Բինբանկում նշել են, որ այս գործարքներից կարող են օգտվել նաեւ ռուսաստանյան որոշ անբարեխիղճ ընկերություններ՝ ԵԱՏՄ ներմուծման արտոնությունների միջոցով հարկերից խուսափելու նպատակով:
Բինբանկում նշել են, որ նմանատիպ գործարքների փորձ Հայաստանից եւ Ղրղըզստանից իրենց մոտ դեռեւս չեն գրանցվել: Նույն բանն են փաստել ռուսաստանյան մի շարք այլ բանկեր: