ՀՀ վարչապետ. 2016թ. բյուջեի հիմքում դրվելու է իրատեսականությունը
ՀՀ վարչապետ Հովիկ Աբրահամյանն այսօր ասել է, որ 2016թ. պետական բյուջեի նախագծի հիմքում դրվել են առաջին հերթին իրատեսականության եւ կայունության դրույթները:
Ինչպես հաղորդում են ՀՀ կառավարության մամուլի ծառայությունից, Հովիկ Աբրահամյանն այս մասին հայտարարել է Ազգային ժողովի մշտական հանձնաժողովների համատեղ նիստում՝ ՀՀ 2016թ. պետբյուջեի նախագծի ներկայացման կապակցությամբ:
«2016թ. պետական բյուջեն եւս ունի հստակ սոցիալական ուղղվածություն, որի մասին վկայում է այն հանգամանքը, որ բյուջետային ծախսերի ամբողջ ծավալի շուրջ կեսը կազմում են սոցիալական, կրթական, մշակութային եւ առողջապահության բնագավառների ծախսերը: Պաշտպանության, հասարակական կարգի պահպանության եւ ազգային անվտանգության ապահովման համար ծախսերը նախատեսված են այս ոլորտներում մեր կենսունակությունն ամրապնդելու եւ պահպանելու տրամաբանությամբ: Շարունակելու ենք Լեռնային Ղարաբաղի Հանրապետությանը տրվող ֆինանսական աջակցությունը»,- ասել է վարչապետը
Գործադիրի ղեկավարը կարեւորել է հայրենի արտադրողին, ինչպես նաեւ արտահանումը հնարավորինս խրախուսելը, երկարատեւ կայուն աճի նախադրյալներ ստեղծելը:
Այս կապակցությամբ անդրադառնալով ՀՀ Հարկային նոր օրենսգրքի քննարկմանն ու ընդունմանը՝ Հովիկ Աբրահամյանն ասել է, որ ֆինանսների նախարարությանը տրվել եմ ուղղորդող ցուցումներ.
- Նախատեսել երկարաժամկետ աճի խթանում` չկենտրոնանալով կարճաժամկետ արդյունքների վրա:
- Երկրի մրցունակության եւ ներդրումային գրավչության բարձրացման համար հարկային համակարգում հիմնական շեշտը դնել սպառման հարկման վրա:
- Որպես հիմնադրույթ հարկ է ընդունել բյուջեի թե՛ կարճաժամկետ, թե՛ երկարաժամկետ կայունությունը:
- Նախատեսել արտոնությունների աստիճանական փոխարինում սուբսիդիաներով, սակայն միայն այն դեպքում, երբ հնարավոր լինի դրանց թիրախավորված տրամադրումը կարիքավոր խավերին` փոխհատուցելով գների հնարավոր աճը:
- Բարեփոխումները պետք է իրագործվեն 3-5 տարվա ընթացքում` հարկային համակարգում կայունություն եւ սահունություն ապահովելու նպատակով:
- Առավել արդարացի հարկման ապահովման նպատակով նախատեսել հարկային մեխանիզմների եւ վարչարարության աստիճանական բարդացում: