Վաշինգտոնը Լեռնային Ղարաբաղը չի տեսնում Ադրբեջանի կազմում․ Դավիթ Բաբայան
Դեսպան Հոգլանդի հայտարարությունը վկայում է, որ Միացյալ Նահանգներն անհնար է համարում Լեռնային Ղարաբաղի վերադարձը Ադրբեջանի կազմ: Այսօր «Ազատության» հետ զրույցում նման դիտարկում արեց Լեռնային Ղարաբաղի նախագահի աշխատակազմի ղեկավարի տեղակալ Դավիթ Բաբայանը:
Ըստ նրա, «ակնհայտ է նաև», որ նման հայտարարությամբ՝ Վաշինգտոնն անընդունելի է համարում հակամարտության կարգավորման ուժային տարբերակը: «Վաշինգտոնը չի տեսնում Արցախը որպես Ադրբեջանի մաս: Սա, կարծում եմ՝ հստակ երևում է բոլոր այդ ձևակերպումներից»,- նշեց Բաբայանը:
ԵԱՀԿ Մինսկի խմբի ամերիկացի համանախագահ Ռիչարդ Հոգլանդի՝ օրերս հրապարակած փաստաթղթի համաձայն, Լեռնային Ղարաբաղի վերջնական կարգավիճակը պետք է որոշվի փոխհամաձայնեցված և իրավականորեն պարտադիր կամարտահայտությամբ, Լեռնային Ղարաբաղի հարակից «օկուպացված տարածքները» պետք է վերադարձվեն Ադրբեջանին, Հայաստանը Լեռնային Ղարաբաղին կապող միջանցքը պետք է բավարար լայնություն ունենա, որպեսզի ապահովվի անվտանգ անցում, «սակայն չի կարող ընդգրկել Լաչինի շրջանն ամբողջությամբ», պետք է ճանաչվեն փախստականների՝ իրենց նախկին բնակության վայրեր վերադառնալու իրավունքը: Հոգլանդ նշել է նաև, որ ցանկացած պարագայում Ղարաբաղում խաղաղապահ առաքելություն է իրականացվելու:
Արձագանքելով այս հայտարարությանը՝ Հայաստանի արտգործնախարար Էդվարդ Նալբանդյանը նշել է՝ Հոգլանդը «թույլ է տվել որոշ անճշտություններ ու բացթողումներ», բայց «դրանք, ընդհանուր առմամբ, արտահայտում են Մինսկի խմբի համանախագահ երկրների նախագահների կողմից Լեռնային Ղարաբաղի հիմնահարցի հանգուցալուծման վերաբերյալ ընդունված հինգ հայտնի հայտարարությունների դրույթները»: Մյուս կողմից՝ Հայաստանում ԱՄՆ դեսպան Ռիչարդ Միլզը նախօրեին «Ազատության» հետ զրույցում հիշեցրեց՝ նշված դրույթները Հայաստանի իշխանություններն ընդունել են որպես կարգավորման բանակցությունների հիմք:
Դավիթ Բաբայանին հարց ուղղեցինք՝ Լեռնային Ղարաբաղի Սահմանադրության համաձայն, ԼՂ իրավազորության ներքո այսօր գտնվող տարածքները համարվում են ԼՂ տարածքի բաղկացուցիչ մասը: Այդ համատեքստում ի՞նչ դիրքորոշում ունի Ստեփանակերտը տարածքների վերադարձին առնչվող՝ Հոգլանդի հայտարարության վերաբերյալ:
«Հաշվի առնելով Ադրբեջանի հայատյաց և տոտալիտար լինելը, մենք չենք կարող հավատալ Ադրբեջանին, առավել ևս՝ մեր ազգի ճակատագիրը կապել Ադրբեջանի քմահաճույքի հետ: Հետևաբար՝ չի կարող լինել վերադարձ անցյալին սահմանների, առավել ևս՝ կարգավիճակի առումով: Մեզ համար ամենակարևորն անվտանգությունն է: Ադրբեջանի ագրեսիայի համար խթանիչ բաղադրամաս է հանդիսացել նաև նախկին ԼՂԻՄ-ի սահմանները: Լինելով անկլավային, դա իրենց մոտ առաջացրել է իլյուզիա, որ հնարավոր է հարձակվել և ոչնչացնել Արցախը մեկընդմիշտ»,- ասաց Դավիթ Բաբայանը:
Նրա խոսքով, արդյունավետ բանակցությունների համար նախևառաջ անհրաժեշտ է ապահովել բանակցություններին Ստեփանակերտի մասնակցությունը, և պետք է հաշվի առնել՝ քանի դեռ համաձայնեցված չէ ամբողջական փաթեթը, ուրեմն համաձայնեցված չէ ոչինչ: Ինչ վերաբերում է խաղաղապահ առաքելությանը, ըստ Դավիթ Բաբայանի, այդ մասին կարելի է խոսել միայն վերջնական կարգավորումից հետո:
Լեռնային Ղարաբաղի խորհրդարանի ընդդիմադիր՝ «Վերածնունդ» խմբակցության ղեկավար Հայկ Խանումյանը խաղաղապահների մասին հիշատակումը հայ ժողովրդի նկատմամբ «ծաղր» որակեց: «Երաշխիքների» համատեքստում նա վկայաբերեց Ուկրաինայի օրինակը, որին ժամանակին անվտանգության երաշխիքներ էին տվել ԱՄՆ-ն, Մեծ Բրիտանիան և Ռուսաստանը, հետո էլ «ձեռքից վերցրել միջուկային զենքը»: «Այն, ինչ տեղի ունեցավ հետո, բոլորս ականատես եղանք»,- ասաց ԼՂ խորհրդարանի պատգամավորը, հիշեցնելով նաև միջազգային խաղաղապահ առաքելությունների «ձախողված օրինակներ»: