«Կարևոր է ոչ թե այն, ինչ ասել է Հոգլանդը, այլ այն, ինչը նա չի ասել»․ Դավիթ Շահնազարյան
«Ազատության» «Տեսակետների խաչմերուկ» հաղորդաշարի հերթական թողարկման հյուրերը քննարկում են Մինսկի խմբի ամերիկացի ժամանակավոր համանախագահ Ռիչարդ Հոգլանդի՝ օրերս հրապարակած փաստաթուղթը, որում, ըստ միջնորդի, ներկայացված են ԼՂ խնդրի կարգավորման հիմնական տարրերը:
Տարածաշրջանային հետազոտությունների կենտրոնի առաջատար վերլուծաբան Դավիթ Շահնազարյանն արձանագրելով, որ ամերիկացի միջնորդի հրապարակած փաստաթղթում «չի ասվել բացառապես ոչ մի նոր բան», և որոշ ժամանակ առաջ նույն [Մադրիդյան] սկզբունքները հրապարակել էր նաև ՄԽ ամերիկացի նախկին համանախագահ Ջեյմս Ուորլիքը:
«Ես այստեղ կարևորում եմ ոչ թե այն, ինչ ասել է դեսպան Հոգլանդը, այլ այն, ինչը նա չի ասել: Ինձ թվում է, դա շատ ավելի բովանդակային է: Եթե վեցնում ենք զուտ հրապարակված փաստաթուղթը, կարող ենք ասել, որ սա մեծ աղմուկ էր ոչնչից, քանի որ հրապարակվածը հայտնի Մադրիդյան սկզբունքներն էին: Բայց 1-2 շաբաթ առաջ նույն դեսպան Հոգլանդը բավական կարևոր հայտարարություններ էր արել սեպտեմբերին ՄԱԿ-ի վեհաժողովի շրջանակում կայանալիք՝ Հայաստանի և Ադրբեջանի արտգործնախարարների հանդիպման վերաբերյալ, նաև նախապատրաստվող բարձր մակարդակի հանդիպման վերաբերյալ:
Նրա շեշտադրումները շատ հստակ էին՝ բոլորի, այդ թվում կողմերի և միջնորդների ջանքերն ուղղված պետք է լինեն շփման գծում լարվածության մեղմացմանն ու զինադադարի կայունացմանը»,- հիշեցնում է Դավիթ Շահնազարյանը և հավելում՝ այն ժամանակ Հոգլանդը, փաստորեն, խոսում էր «կարծես թե արդեն մոռացված հարցի մասին», այն է՝ Վիեննայի և Սանկտ Պետերբուրգի համաձայնությունների շրջանակում շփման գծի երկայնքով արձանագրող հատուկ սարքերի տեղադրումը:
«Մինչդեռ այս անգամ նա ոչինչ չի ասել, բացի հայտնի սկզբունքների հրապարակումը: Իմ եզրակացությունը հետևյալն է՝ սա ցայտուն կերպով վկայում է այն մասին, որ այսօր Վաշինգտոնը չունի հստակ ձևակերպված քաղաքականություն Հարավային Կովկասի հանդեպ: Սա վկայում է նաև այն մասին, որ այսօր ԱՄՆ-ը բացարձակապես պատրաստ չէ՝ ղարաբաղյան կարգավորման հարցում մեծացնել իր դերակատարությունը»,- նշում է Դավիթ Շահնազարյանը:
ՀՅԴ բյուրոյի անդամ, Հայ դատի և քաղաքական հարցերի գրասենյակի պատասխանատու Կիրո Մանոյանը չի կարծում, թե Հոգլանդի հայտարարությունն արվել է Միացյալ Նահանգների կողմից «ինչ-որ մեսիջ» ուղարկելու համար: «Կարծում եմ՝ սա շատ պարզ բացատրություն ունի՝ դեսպան Հոգլանդը ցանկացել է արձանագրել իր պաշտոնավարման շրջանի ավարտն ու ինչ-որ մի բան է ասել շատ ընդհանուր գծերի մեջ: Իրականում միշտ է սա քննարկվել: Իսկապես նոր բան չկա իր ասածների մեջ, և կարծում եմ՝ իզուր տեղը չպետք է այնտեղ ինչ-որ բաներ տեսնել, որոնք չկան»,- ընդծում է Մանոյանը:
Քննարկումն ամբողջությամբ՝ տեսանյութում