Юзга яқин талабанинг номзоди Ўзбекистон ёшлар иттифоқи томонидан маъқулланди
Мамлакатимизда талаба-ёшларни ҳар жиҳатдан қўллаб-қувватлашга катта эътибор қаратилмоқда. Хусусан, олий ўқув юртлари томонидан моддий қўллаб-қувватлаш учун тавсия этилаётган талабаларнинг ўртача ўзлаштириш кўрсаткичи ўқув йилининг биринчи семестрида 86 фоиз ва ундан юқори бўлиши талаб этилади.
Жорий йилда таълим соҳасида моддий қўллаб-қувватлашга қаратилган лойиҳада иштирок этиш истагини билдирган Бухоро вилоятидаги тўрт олий ўқув юрти талабаларининг 476 нафари ариза билан мурожаат қилди.
Даъвогарлар орасида муносибларни саралашда, уларнинг нафақат яхши ёки аъло баҳоларда ўқиши, фан олимпиадалари ва спорт мусобақаларидаги натижалари, балки, олий таълим муассасаси фаолиятидаги маънавий-маърифий ва жамоат ишларида, Ёшлар иттифоқининг бошланғич ташкилоти, маҳаллий ва ҳудудий кенгашлари, мазкур ташкилот марказий кенгаши томонидан ташкил этиладиган лойиҳа ҳамда тадбирларидаги фаоллигига ҳам алоҳида эътибор қаратилди.
Танлаб олинган 97 талабанинг номзоди Ёшлар иттифоқи Марказий кенгаши томонидан маъқулланди.
Куни кеча вилоят Ёшлар марказида бакалавриат ва магистратура босқичларида таълим олаётган ёшларга тўлов-контракт тўловини тўлаб берилиши тўғрисидаги сертификатлар тантанали равишда топширилди.
– Албатта, совриндор бўлганимдан хурсандман, – дейди Бухоро давлат университетининг инглиз тили филологияси йўналишида таълим олаётган Шерзод Шаропов. – Ёшлар иттифоқи томонидан қўллаб-қувватланишим оиламиз бюджети учун катта мадад бўлди. Қолаверса, бу мени фанларни чуқур ўзлаштириш, Ёшлар иттифоқи ташкилоти лойиҳаларида янада фаол иштирок этишга, изланишга рағбат уйғотади.
Таъкидлаш керак, жорий ўқув йилида тўлов-контракт шартномаси асосида таълим олаётган бухоролик талаба-ёшларга Ёшлар иттифоқи маркази кенгаши томонидан тўлаб берилган жами маблағ қарийб 304,2 миллион сўмни ташкил этмоқда.
