«Газпром межрегионгаз Казань» җәмгыяте коллективына яңа җитәкче тәкъдим иттеләр
(Казан, 20 июль, «Татар-информ»). Татарстан Премьер-министры Алексей Песошин «Газпром межрегионгаз Казань» АҖ коллективына яңа генераль директор - Ринат Сабировны тәкъдим итте. Бу хакта ТР Президентының матбугат хезмәте хәбәр итә.
Республика Президенты ярдәмчесе булып ун ел эшләгән Ринат Сабиров компания җитәкчесе вазифасында «Газпром межрегионгаз Казань» акционерлык җәмгыятен 1998 елдан бирле җитәкләгән Ринат Ханбиковны алыштырды.
Алексей Песошин үз чыгышында билгеләп үткәнчә, «Газпром межрегионгаз Казань» акционерлык җәмгыятендә эшләгән чорда Ринат Ханбиков үзен тәҗрибәле оештыручы һәм үз эшенең остасы буларак танытты. Ул газ белән тәэмин итү өлкәсендә түләү дисциплинасын ныгыту өчен күп эш башкарды. 2015 елдан Татарстанда бу өлкәдә бурычның кимүе күзәтелә.
«Сезгә башкарган эшегез өчен рәхмәт әйтәсем килә. Һөнәри сыйфатларыгыз һәм бай тәҗрибәгезнең алга таба да кирәге чыгар дип ышанам», - диде ТР Хөкүмәте башлыгы һәм шуннан соң Ханбиковка «Татарстан Республикасы алдындагы хезмәтләре өчен» орден медален тапшырды.
Песошин Сабировка яңа җаваплы эштә уңышлар теләде. «Үзегезгә йөкләнгән вазифаны лаеклы төстә үтәрсез дип ышанам», - диде Премьер-министр.
Үз чиратында, «Газпром межрегионгаз» ҖЧҖ генераль директоры урынбасары Юрий Пахомовский ачыклык керткәнчә, Ринат Ханбиков компания генераль директорының киңәшчесе булып калачак.
«Татар-информ» агентлыгы Татарстан Президенты Рөстәм Миңнехановка «Газпром межрегионгаз Казань» акционерлык җәмгыятенең яңа генераль директорын тәкъдим итүләре хакында язып чыккан иде инде.