Татарстанда гриппка каршы прививканың коронавируска йогынтысы турында сөйләделәр
(Казан, 20 июль, «Татар-информ», Эвелина Киселева). Татарстанда Covid-19 инфекциясе белән авыручыларның күбесе грипптан прививка ясатмаган. Бу хакта «Татар-информ» мәгълүмат агентлыгында узган матбугат конференциясендә Роспотребнадзорның Татарстан буенча идарәсе җитәкчесе урынбасары Любовь Авдонина сөйләде.
«Ел башында, яңа коронавирус инфекциясе башлангач, тиешле анализ үткәрдек. Авыручыларның грипптан прививка ясату-ясатмавын тикшердек. Авыручылар арасында гриппка каршы прививка ясатучылар санаулы гына булган. Яңа коронавирус инфекциясе белән авыручыларның төп массасы грипптан прививка ясатмаган», — дип аңлатты спикер.
Сораштыру апрельдә һәм майда үткәрелде. Роспотребнадзорның республика идарәсе җитәкчесе урынбасары сүзләренчә, төбәктә мондый статистиканы алып бармыйлар, чөнки грипптан иммунитет нибары бер ел гына саклана. Аның фикеренчә, прививка ясаткан татарстанлыларның күбесенең иммунитеты беткән инде.
Авдонина әйткәнчә, грипп вакцинациясе авыруның хәле катлауланудан, шул исәптән вируслы пневмониядән дә саклаячак.