Ýylanlyda ilatyň elektrik üpjünçiligi ýaramazlaşdy
Ýaşaýjylar elektrigiň yzygiderli kesilmeginiň elektronik enjamlaryň hatardan çykmagyna hem getirýändigini aýdýarlar. Bu barada Azatlyk Radiosynyň habarçysy 10-njy ýanwarda sebitden maglumat berdi.
“Şu ýylyň başyndan bäri welaýatyň Ýylanly etrabynda tok üpjünçiligi juda ýaramazlaşdy. Tok günüň dowamynda azyndan bäş sapar uzak wagtlap kesilýär” diýip, etrap ýaşaýjysy anonimlik şertinde aýtdy.
Elektrik üpjünçiligi ýola goýlanda hem, ýaşaýjylar olaryň güýjüniň juda pesliginden nägile bolýarlar. Elektrik enjamlarynyň köpüsini kadaly işledip bolmaýar.
Bu ýagdaý, jaýlardaky suw gyzdyryjy enjamlaryň öz güýjünde işlemezligine getirip, netijede, ilatyň gyzgyn suwsuz kösenmegine sebäp bolýar.
“Jaýlardaky merkezleşdirilen ýyladyş ulgamlary kadaly işlemeýändigi sebäpli, köp ýaşaýjy elektrik peçlerden peýdalanýar. Tok kadaly berilmeýändigi sebäpli, ilat bu peçler bilen-de öýlerini ýyladyp bilmeýär” diýip, ýaşaýjy sözüne goşdy.
Üstesine-de, tok üpjünçiligi kesilip, gaýtadan dikeldilende onuň adatdakysyndan ýokary güýçde goýberilmegi, elektrik enjamlarynyň hatardan çykmagyna hem getirýär.
“Raýatlaryň suw gyzdyryjylary, elektrik peçleri, sowadyjylary hatardan çykýar” diýip, ýene bir etrap ýaşaýjysy anonimlik şertinde aýtdy.
Ýaşaýjylar indi 10 gün bäri dowam edýän bu bökdençlikler barada ýerli elektrik üpjünçiligi edarasyna ençeme gezek ýüzlenendiklerini aýdyp, ýerli häkimiýetleriň meseläni çözmek üçin hiç hili ädim ätmeýändigini belleýärler.
“Köp adam ýerli tok edarasynyň resmilerinden hatardan çykan enjamlarynyň öwezini dolmagy hem soraýar. Ýöne ilatyň bu talaplary, tok üpjünçiliginden nägile bolmagy ýolbaşçylaryň piňine hem däl” diýip, ýaşaýjy aýtdy.
Azatlyk ýokarda beýan edilen ýagdaýlar barada ýerli elektrik üpjünçilik edarasyndan teswir alyp bilmedi.
Bu maglumat, prezident Serdar Berdimuhamedowyň ýaşaýyş jaýlarynyň, mekdepleriň, çagalar baglarynyň ýyladyş ulgamlarynyň işledilişini, ilatyň elektrik energiýasy, tebigy gaz, agyz suwy bilen üpjünçiligini berk gözegçilikde saklamagy tabşyran mahalyna gabat geldi.
Türkmen lideri bu barada Ministrler Kabinetiniň başlygynyň orunbasary Taňryguly Atahallyýewiň hem-de welaýatlaryň häkimleriniň gatnaşmagynda 6-njy ýanwarda geçirilen iş maslahatynda belledi. Mundan öň, president bu barada geçen ýylyň 16-njy dekabrynda geçirilen hökümet maslahatynda nygtap geçipdi.
Her ýylyň güýz paslynda güýçlenip, gyş aýlarynda hem dowam edýän bu tabşyryklara garamazdan, ýangyç serişdelerine baý Türkmenistanda ilatyň ýyladyş ulgamlarynyň işledilişinde, elektrik energiýasy, tebigy gaz we agyz suwy bilen üpjünçiliginde bökdeçnlikler yzly-yzyna ýüze çykýar.
Şu hepdäniň başynda Balkan welaýatyndaky habarçymyz Gyzylarbat etrabynda ilatyň ýaşaýyş jaýlarynda gaz üpjünçiliginiň ýaramazlaşandygyny habar berdi.
Şonda ol ilat arasynda elde ýasalan gaz peçlerini ulanýanlaryň köpelýändigini hem aýtdy. Gaz hünärmenleri bolsa, bu peçleriň howpsuzlyk nukdaýnazaryndan ygtybarly däldigini belläp, bularyň köpçülikleýin ulanylmagyna alada bildirdiler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.