Lebapda 'Green Card' lotereýasy üçin anketa doldurýan raýatlar köpelýär
“Türkmenabat şäherindäki wiza we terjimeçilik merkezlerine ýüzlenip, iňlis dilindäki anketany doldurdmak isleýän adam juda köp. Olaryň arasynda erkekler we zenanlar bar. Ýöne umuman alanyňda, erkekleriň sanynyň has köpdügini synlasa bolýar” diýip, habarçymyz belledi.
ABŞ-nyň hökümeti Türkmenistanda halk içinde “ýaşyl kart” lotereýasy diýilýän programma arkaly beýleki ýurtlaryň raýatlaryna amerikan ýaşaýyş durumyny almak mümkinçiligini döredýär. Ýylda bir gezek gurnalýan diwersifikasiýa utuşlaryna gatnaşyjylar iňlis dilindäki ýörite anketany online görnüşde dolduryp iberýärler.
Iňlis dilini gowy bilmeýän ýa-da iňlis diliniň derejesi pes bolan köp adam anketalary doldurmak üçin wiza we terjimeçilik merkezleriniň hyzmatlaryndan peýdalanýar.
“Raýatlar öz ýany bilen biometriki pasportyny, mat görnüşdäki suratyny eltýär. Şeýle-de, şol merkezlerde anketadaky soraglara jogap ýazdyrdyp, olary doldurdýarlar we hasaba goýdurdýarlar. Raýatlaryň her biri bu hyzmat üçin 300 manat töleýär. Anketalary dolduryp bermek hyzmaty noýabryň 5-ne çenli dowam edýär” diýip, habarçymyz belledi.
Habarçymyzyň tassyklamagyna görä, “Green Card” lotereýasyna isleg bildirýän raýatlaryň köpelmegine, ykdysady kynçylyklar we işsizlik bilen bir hatarda, lotereýanyň soňky netijeleriniň yglan edilmeginiň yz ýany, utuş gazanan türkmenleriň arasynda sebit ilatynyň köp bolmagy hem täsir edipdir.
“Bu, agyr ykdysady we durmuş şertlerinden çykalga gözelýän raýatlar üçin umyt döretdi. Adamlar daş-töweregindäki tanyşlarynyň utuş gazanandygyny eşidensoň, bu umydyň hasyl bolmak ähtimallygynyň ýokarydygyna göz ýetirip başladylar” diýip, anketa doldurtmak üçin wiza merkezine baran bir türkmenabatly anonimlik şertinde habarçymyza gürrüň berdi.
ABŞ-nyň Döwlet departamentiniň saýtyna görä, lotereýanyň soňky netijeleri şu ýyl utuş gazanan türkmen raýatlarynyň sanynyň, mundan sekiz ýyl ozalkysy bilen deňeşdirilende, azyndan 14 esse artandygyny görkezýär.
“Green Card” lotereýasynda ýeňiş gazanan türkmenistanlylaryň sany 2016-nji ýylda 91-e, 2017-nji ýylda 306-a, 2018-nji ýylda 258-e, 2019-njy ýylda 515-e, 2020-nji ýylda 870-e, 2021-nji ýylda 745-e, 2022-nji ýylda 555-e deň boldy. 2023-nji ýylda bolsa, bu görkeziji 1313 adama barabar boldy. Bu, geçen ýyl bilen deňeşdirilende, iki esseden hem köpdür.
Türkmenistanda “Green Card” lotereýasyna gyzyklanma bildirýänleriň göz-görtele artandygy barada Azatlygyň habarçylary awgust aýynda hem maglumat beripdiler.
Habarçylarymyz şonda olaryň arasynda diňe işsizlikden kösenýän raýatlaryň däl, eýse döwlet edara-kärhanalarynda işleýän ýokary derejeli hünärmenleriň hem bardygyny aýdypdylar.
Türkmenistanlylaryň ençemesi bolsa, özleriniň lotereýa gyzyklanma bildirmegine ýurtda dowam edýän ýiti ykdysady kynçylyklar bilen bir hatarda, häkimiýetleriň syýasy, ykdysady we sosial basyşlarynyň barha artmagynyň sebäp bolýandygyny gürrüň beripdi.
Türkmenistanda indi alty ýyl çemesi wagt bäri dowam edýän ýiti ykdysady kynçylyklaryň, giň ýaýran işsizligiň arasynda, köp raýat gazanç we ýaşamak üçin başga ýurtlara gitmäge çalyşýar. Türkiýe, Russiýa, Birleşen Arap Emirlikleri bu ýurtlaryň başynda gelýär.
Ýöne soňky bir ýylyň dowamynda türkmenleriň Türkiýede gazanç mümkinçiligi hem ýiti çäklendirildi. Muňa Türkiýäniň 2022-nji ýylyň sentýabrynda Aşgabadyň talaby esasynda bu ýurda barýan türkmenistanlylar üçin wiza düzgünini girizmegi we şu ýylyň tomsundan bäri bu ýurtda bikanun migrantlara garşy geçirilýän reýdleriň çäginde türkmen migrantlarynyň köpçülikleýin, zor bilen deportasiýa edilmeginiň ýygjamlaşmagy sebäp boldy. Bu ýagdaý, Russiýa Federasiýasyna işlemäge gidýän ýa-da gitjek bolýan raýatlaryň köpelmegine getirdi.
“Adamlar Russiýa gitmek üçin uly çykdajy edýärler, prosentine pul karz alýarlar” diýip, habarçymyz oktýabryň başynda gürrüň berdi.
Ýurtdaky ykdysady kynçylyklary we giň ýaýran işsizligi resmi dereje boýun almaýan türkmen häkimiýetleri Türkmenistanyň raýatlygyna kabul edilen ýa-da ýurtda ýaşamaga ygtyýarnama alan daşary ýurtlularyň sany baradaky maglumatlary wagtal-wagtal yglan edýärler. Ýöne olar daşary ýurtlara işlemäge ýa hemişelik ýaşamaga gidýän türkmen raýatlarynyň sany we olaryň näme sebäpden bu netijä gelýändigi hakda mesele gozgamaýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.