Biometriki pasport üçin nobat 2024-nji ýylyň maýyna çenli uzady
Lebap welayatynda biometriki pasporty almak isleýänler gaty köp, emma dokument taýýarlatmak üçin raýatlara diňe 2024-nji ýylyň maý aýynda ýüz tutmaga mümkinçilik birilýär.
Azatlyk Radiosynyň habarçysynyň maglumatyna görä, pasport nobaty indiki ýylyň mart aýyndan maý aýyna çenli sanlyja günüň dowamynda uzapdyr.
"Geçen hepde Migrasiýa gulluklary mart aýyna talon berýärdi, indi bolsa tallonar indiki ýylyň maý aýyna berilýär" - diýip, Lebapdaky habarçymyz 16-njy oktýabrda aýtdy.
Azatlygyň welaýatdaky habarçylarynyň sözlerine görä, häzirki wagtda ýerli Migrasiýa gullugynyň ofislerine günde birnäçe ýüz adam gelýär.
Habarçylar talonlaryň gaýtadan berlip, başlanmagynyň gowy habardygyny belleýärler we ýerli ýaşaýjylaryň iň bolmanda indiki ýyl pasport almak mümkinçiliginiň artýandygyny aýdýarlar. Öňki aýlarda ýerli migrasiýa edaralary täze ýyldan nobatlaryň ýazgy boýunça däl-de, adamlaryň özleriniň baryp durmaly boljakdygyny aýdyp, talonlaryň berilmegini togtadypdy.
Talonlaryň berilmegi oktýabr aýynyň başynda gaýtadan başlandy. Anonim gürlän migrasiýa gullugynyň işgärleriniň habar bermegine görä, oktýabr aýynyň ilkinji iki hepdesinde talonlar fewral aýy üçin berlip gutarypdyr, soň binäçe günüň içinde mart aýyna berlipdir, indi bolsa maý aýyna berilýär.
Emma indiki ýylyň nobatyna talon almak işi hem aňsat däl.
Indiki ýyla talon almak üçin arza beriji kwitansiýany almaly we eýýäm häzir indiki ýyl beriljek pasport üçin döwlet tölegini tölemeli. Bu töleg 60 manat möçberilne (Merkezi Bankyň kursy boýunça boýunça 17 amerikan dollaryna barabar - red). Munuň bilen baglylykda şu günler banklaryň öňünde kwitansiýa boýunça töleg geçirmek üçin baran adamlaryň nobatlary hem peýda bolýar.
Mundan öň Daşoguz welaýatynda biometriki pasport almak isleýän raýatlaryň nobatynyň 2024-nji ýylyň iýulyna çenli uzandygy habar berildi.
Daşary ýurt pasportyna bolan islegiň artmagy bilen bir hatarda, dokument aljak bolýan raýatlardan edilýän talaplar hasam kynlaşýar. Sentýabr aýynda Lebap welaýatynyň ýaşaýjylaryna SSSR döwründe berlen dogluş hakyndaky şahadatnamalary esasynda pasport berilmejekdigi aýdyldy.
Şu ýylyň ýaz aýlarynda, Balkan welaýatynda, kämillik ýaşyna ýetmedik çagalary bolan ýaşaýjylaryň, şeýle hem maşgalasynda sud edilen garyndaşynyň ýokdugyny tassyklaýan “uç arka” resminamasyny berip bilmedikleriň pasport üçin tabşyran arzalaryny hasaba almakdan we olara daşary ýurt pasportlaryny bermekden ýüz öwrüpdi.
Türkmenistanda işsizlik we durmuş şertleriniň barha agyrlaşmagy zerarly daşary ýurt pasportlaryna bolan islegiň fonunda häkimiýetler raýatlaryň daşary ýurda gitmegini çäklendirmäge gönükdirilen päsgelçilikleri yzygiderli döredýärler. Býurokratik kynçylyklar, daşary ýurtlara gitmäge islegiň güýçlenýän wagtynda bu ugurda korrupsiýa üçin şert döredýär.
Türkmenistanyň raýatlary biometrik pasportlaryny diňe ýurduň çäginde alyp bilýärler, daşary ýurtlarda ýaşaýan türkmen raýatlary pasportlaryny şol ýurtdaky Türkmenistanyň ilçihanasynda ýa-da konsullygynda alyp ýa-da täzeläp bilmeýärler.
Biometrik pasporty almakdaky kynçylyklar Türkmenistanyň daşynda, şol sanda Türkiýe ýaşaýan müňlerçe türkmen raýatynyň pasportlarynyň möhleti gutaryp, bikanun statusda galmagyna sebäp boldy.
Rus dilinde hem okaň
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.