Gurbanguly Berdimuhamedowyň Mary welaýatyna sapar etmegine garaşylýar
Welaýatyň Jemagat hojalygy müdirliginiň işgärleri köçeleri syryp-süpürýarler, baglaryň düýbüni ýumşadyp, ýol gyralaryna gül ekýärler, ýol kenarlarynda ýagyşdan soň üýşen suwlary aýyrýarlar.
“Gurbanguly hajy metjidinde hem arassaçylyk işleri ýaýbaňlandyrylýar. Berdimuhamedow welaýata sapar edende, hökmany suratda öz adyny göterýän metjitde sadaka bermek, doga-dileg etmek işleri bilen meşgullanýar” diýip, ýerli ýaşaýjylar aýdýarlar.
Türkmenistanyň prezidenti Serdar Berdimuhamedow soňky bir aýdan gowrak wagtyň dowamynda Mary welaýatyna yzly-yzyna azyndan üç gezek sapar etdi. Ol ilkibaşda, 19-njy ýanwarda sebitde ýerleşýän “Galkynyş” gaz känine baryp gördi, 26-njy ýanwarda ýene bir gezek Mary sebitine baryp, ol ýerde Ministrler Kabinetiniň göçme mejlisini geçirdi, munuň yz ýany, 7-nji fewralda, iki hepdäniň dowamynda üçünji gezek, Mary welaýatyna baryp, beýleki meseleler bilen bir hatarda Garagum kanalynyň kenarynda alnyp barylýan işleri maslahat etdi.
“Serdar Berdimuhamedow welaýatyň çäginden akyp geçýän Garagum derýasynyň kenarlaryny berkitmek boýunça alnyp barylýan işler bilen hem tanyşdy. Derýada kadaly suw akymyny almak üçin degişli işler geçirilýär” diýip, TDH şonda habar berdi.
Berdimuhamedowyň sebite amala aşyran saparlary ýanwar aýynda ýurda aralaşan adatdan daşary sowuk howanyň arasynda ýurduň gündogar sebitlerinde ýerleşýän iri suw akabalarynda, şol sanda Garagum derýasynda buzluklaryň emele gelip, munuň yz ýany, howanyň maýlap başlamagy bilen, suw joşmalary bilen bagly aladalaryň dörän wagtlaryna gabat geldi.
Sebitde ýerleşýän iri suw akabalarynda suwuň joşmak howpy bilen bagly dörän aladalaryň fonunda Amyderýanyň we Garagum kanalynyň kenarlaryny berkitmek işlerine girişildi. Bu aralykda, buzluklaryň eräp başlamagy bilen, Garagum derýasy öz akymyny üýtgedip, bölekleýin çölüň içine akmaga başlady.
Maryly ýaşaýjylar kanalyň kenarlaryny berkitmek işleriniň heniz hem dowam edýändigini aýdýarlar.
“Şu günler müňlerçe adam zähmet çekýär. Ilkibaşda, Garagum kanalynyň akymyny üýtgedip, çöle akýan bölegi böwetlendi diýip, pikir etdiler. Ýöne suw täzeden böwedi böwsüp, ýene çölüň içine akmagyny dowam etdirýär” diýip, kanalyň kenarlaryny berkitmek işlerine gatnaşýan bir ýerli ýaşaýjy Azatlyk Radiosynyň habarçysyna gürrüň berdi.
Gurbanguly Berdimuhamedowyň Mary sebitine amala aşyrmagyna garaşylýan saparynyň dowamynda Garagum derýasynyň kenarynda alnyp barylýan işler bilen hem tanyş bolmagyna garaşylýar diýip, Azatlygyň çeşmeleri habar berýär.
Türkmenistanyň prezidenti Serdar Berdimuhamedow 19-njy ýanwarda Mary sebitine eden saparynyň dowamynda Garagum derýasyny dikuçarda synlady. Şonda prezident derýada buz gatlagynyň dörändigini, şoňa görä-de, onuň kenarlaryny berkitmek işine jogapkärçilikli çemeleşmegiň zerurdygyny nygtady.
Türkmen häkimiýetleri adatça ýurduň çäginde bolup geçýän adatdan daşary tebigy hadysalar barada beýanat bermeýär.
Berdimuhamedowyň sebite etmegine garaşylýan sapary soňky bir aýdan gowrak wagtyň dowamynda ata we ogul Berdimuhamedowlaryň Mary sebitine amala aşyrýan azyndan dördünji sapary bolar.
Türkmenistanda geçen ýyl Gurbanguly Berdimuhamedowyň prezident wezipesini ogly Serdar Berdimuhamedowa geçirmeginden soň, döwlet metbugat serişdeleri iki Berdimuhamedowyň hem sebitlere, ýa-da daşary ýurt döwletlerine amala aşyrýan saparlary barada habar berip başlady.
Gurbanguly Berdimuhamedow şu ýylyň ýanwarynda täze döredilen Halk maslahatynyň başlygy wezipesine bellendi we “türkmen halkynyň milli lideri” yglan edildi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.