Ýurda sowuk howa aralaşýan mahaly, IIM gyş paslynda ýangyn howpsuzlygynyň berjaý edilmegine çagyrýar
Ýurda adatdan daşary sowuk howa aralaşýan mahaly, içeri işler edarasy “Altyn Asyr” öýjükli aragatnaşyk ulgamynyň üsti bilen raýatlara gyş paslynda ýangyn howpsuzlygynyň düzgünleriniň berjaý edilmegi babatda duýduryş SMS-lerini ugradýar.
“Hormatly watandaşlar! Gyş paslynyň dowam edýän günlerinde, elektrik-gaz enjamlary ulanylanda ýangyn howpsuzlyk düzgünlerini dogry berjaý etmelidigiňizi, öýüňizden we iş ýerleriňizden gitmezden öň, elektrik-gaz enjamlaryny öçürmelidigiňizi ýatladýarys” diýip, Türkmenistanyň Içeri işler ministrliginiň Ýangyn howpsuzlygy gullugy tarapyndan ‘Altyn Asyr’ öýjükli aragatnaşyk ulgamy arkaly abonentlere iberilen SMS-de aýdylýar.
Mundan ozal, Azatlygyň habarçylary hojalyklarda gaz we elektrik enjamlarynyň nädogry ulanylmagy bilen baglanyşykly ýüze çykan heläkçilik hadysalary barada habar berdi. Ýatlasak, geçen aý Türkmenabatda bir maşgalanyň dört agzasy gaz enjamlarynyň nädogry ulanylmagy zerarly, gazdan zäherlendi. Betbagtçylygyň yz ýany, içeri işler edaralary hojalyklardaky gaz enjamlaryny barlamak işlerini gaýtadan güýçlendirdi.
Türkmenistanyň hökümeti ýurduň ähli sebitlerinde gyş möwsüminde ýaşaýyş jaýlarynda we ähli desgalarda ýyladyş ulgamlarynyň kadaly işleýändigini aýdýar, ýöne Azatlygyň habarçylary wagtal-wagtal ýurduň sebitlerindäki ýyladyş ulgamlarynda döreýän näsazlyklar, ýa-da demirgazyk we gündogar sebitlerde ýerleşýän çetki obalarda odun ýakyp ýylanmaga çalyşýan hojalyklar barada habar berýärler.
“Häzir Türkmenabat şäherinde ýollar sürçek bolmagynda galýar” diýip, Azatlyk Radiosynyň habarçysy 10-njy ýanwarda ir bilen sebitden habar berdi.
Howa maglumatlaryna görä, sişenbe güni howanyň temperaturasy sebit merkezinde gündiz -3 gradusa çenli aşaklady. Hepdäniň dowamynda sebitde aýazly howa saklanyp galýar. Anna güni howanyň temperaturasynyň gündiz -6 gradusa çenli, gije bolsa -16 gradusa çenli aşaklamagyna garaşylýar.
Azatlyk Radiosynyň habarçysy 10-njy ýanwara geçilen gije şäherde gije sagat 23:30 töwereklerinden irden sagat 5:15 töwereklerine çenli dyngysyz gar ýagandygyny, ir bilen ýollaryň typançaklaşandygyny habar berdi.
Bu aralykda, Lebap welaýatyna aralaşan sowuk howanyň 11-nji ýanwara geçilýän gije -14 gradusa çenli pese gaçmagyna garaşylmagy bilen, bu gije sebitiň çäginde ýerleşýän döwlet edara-kärhanalarynda “nobatçylyk gurnalýar”, diýip lebaply bir býujet işgäri Azatlyk Radiosynyň habarçysyna gürrüň berdi. Şeýle-de, iş ýerlerinde ýangyn howpsuzlygy bilen bagly düşündirişler ýygjamlaşýar.
“Içeri işler ministrliginiň Ýangyn howpsuzlygy gullugy edara-kärhanalara baryp, ýangyn howpsuzlygynyň berjaý edilmegi, elektrik peçleriniň ulanylmazlygy barada duýduryş berýär” diýip, Azatlyk Radiosynyň habarçysy sebitden maglumat berýär.
Türkmenabadyň şäher ýollarynyň gardan soň typançaklaşmagy bilen, Jemagat gullugy ýollarda sürçekligi aradan aýyrmak tagallalaryna badalga berdi.
“Häzir Türkmenabadyň ýollary typançak bolmagynda galýar. Jemagat gullugy ... köprülere çäge döküp çykdy” diýip, bir şäher ýaşaýjysy sişenbe güni Azatlyk Radiosynyň habarçysyna gürrüň berdi.
Türkmenistanyň döwlet telewideniýesiniň “Watan” habarlary gepleşigi hem 8-nji ýanwar sanynda hepdäniň dowamynda ýurtda boljak howa barada maglumat berdi.
Ýylyň ilkinji gary Aşgabada 9-njy ýanwara geçilen gije ýagdy.
Bu aralykda, Azatlygyň bir çeşmesi goşmaça iberen maglumatynda sowuk howa zerarly, Lebap we Daşoguz sebitleriniň orta mekdeplerinde okuwçylaryň gyşky dynç alyş günleriniň 18-nji ýanwara çenli uzaldyljakdygy barada malgumatlaryň bardygyny habar berdi. Azatlygyň ikinji çeşmesi bu maglumaty tassyklamady.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.