Hökümetçi neşir Aşgabatdaky türk konsullygynyň talap edýän wiza resminamalarynyň sanawyny çap etdi
Türkiýä gitmek isleýän Türkmenistanyň raýatlary uzak möhletleýin syýahatçylyk wizasyny resmileşdirip bilerler diýip, “Orient” Aşgabatdaky türk ilçihanasyny sitirleýär.
Neşire görä, Türkiýe respublikasyna uzak möhletleýin syýahatçylyk wizasyny almak isleýän türkmen raýatlaryndan, beýleki resminamalar bilen bir hatarda, içerki pasportyň 1,3,5,9 we 32-nji sahypalarynyň göçürmeleri hem talap edilýär. Şeýle-de, raýatlardan arza, pasport, ätiýaçlandyryş, fotosurat, girdeji subutnamasy, öňünden sargalan uçar petegi we myhmanhana sargydy, ýa-da türk raýatynyň çakylygy talap edilýär. Hökümetçi neşir uzak möhletli türk syýahatçylyk wizasyny almak üçin, syýahatyň maksadyna görä, goşmaça resminamalaryň hem talap edilip bilinjekdigini belleýär.
Hökümetçi neşir ilkibaşda 6-njy sentýabrda günüň birinji ýarymynda çap eden habarynda Türkmenistanyň raýatlarynyň bir aýyň dowamynda Türkiýä wizasyz sapar edip bilýändikleri baradaky maglumaty agzamady. Ýöne yz ýany, neşir habary täzeläp, wiza talaplarynyň bir aýdan artyk Türkiýä sapar etmek isleýän raýatlara degişlidigini aýtdy.
Soňky birnäçe aý bäri köp sanly türkmenistanly raýatlary bir sorag gyzyklandyrýar? Eýsem, Türkiýe respublikasy Türkmenistanyň raýatlaryna 30 gün möhlet bilen hödürleýän wizasyz syýahat düzgünini ýatyrdymy?
Türkmenistanyň Daşary işler ministrliginiň türk wizalary bilen bagly çap eden beýanatyndan soňra bu meseläniň töweregindäki soraglar, hususan-da, sosial media ulanyjylarynyň arasynda has-da gyzyşdy.
“Türkmenistanyň raýatlarynyň Türkiýe Respublikasynda bolmaklary bilen bagly düzgünleri kämilleşdirmek we ulgamlaýyn esasda alyp barmak maksady bilen, türkmen tarapy Türkiýe Respublikasynyň döwletine Türkmenistanyň raýatlary üçin wagtlaýyn esasda dürli görnüşli wiza düzgüniniň girizilmegi barada ýüzlendi” diýip, Türkmenistanyň daşary syýasat edarasy hepdäniň ahyrynda beýanat çap etdi.
Biraz ozal, Türkiýe bilen Türkmenistanyň arasyndaky birtaraplaýyn wizasyz syýahat düzgüniniň ýatyrylmak ähtimallygy barada habarlar we sosial media maslahatlaşmalary peýda boldy.
5-nji awgustda turkmen.news neşiri öz çeşmelerine we sosial media postlaryna salgylanyp, türkmen ýolagçylarynyň Türkiýä wizasyz goýberilmeginiň togtadylandygyny habar berdi.
Ýöne Türkiýe bilen Türkmenistan aradaky gysga möhletli wizasyz syýahat düzgüniniň ýatyrylmak ähtimallygy baradaka sosial media maslahatlaşmalary has ozal başlady.
Özüni žurnalist hökmünde tanyşdyrýan Merdan Çaryýew atly Twitter ulanyjysy dört aý mundan ozal, 7-nji maýda wiza düzgüniniň töwereginde garaşylýan üýtgeşmeler barada twit paýlaşdy:
“Sentyabr 2022-den başlap, Türkiýe respublikasy Türkmenistanyň raýatlaryndan wiza talap edip başlaýar” diýip, Twitter ulanyjysy aýtdy.
Bu twit türkmen dilli sosial media ulanyjylarynyň arasynda ara alnyp maslahatlaşylmaga başlandy. Kimler maglumatyň çeşmesi bilen gyzyklansa, kimler bu maglumaty ýalňyş maglumat hasaplady.
Türkmenistanyň daşary işler ministrligi soňky beýanatynda Türkiýe bilen arada hereket edýän wiza düzgüniniň töweregindäki jikme-jiklikleri aýdyňlaşdyrmady.
Ýöne Türkiýäniň Daşary işler ministrliginiň resmi web sahypasy entek Türkmenistanyň raýatlarynyň 30 gün möhlet bilen türk respublikasynyň çäginde wizasyz galyp bilýändiklerini aýdýar.
Türkiýe 2007-nji ýylyň awgustynda Türkmenistanyň raýatlary üçin gysga möhletli wiza talabyny ýatyrdy. Şondan bäri, Türkmenistanyň raýatlary 30 gün möhlet bilen Türkiýe respublikasyna wizasyz sapar edip bilýärler. Türkiýe Türkmenistanyň raýatlaryna degişli wizasyz syýahat düzgünini birtaraplaýyn yglan etdi.
Aradan geçen 15 ýylyň dowamynda Türkiýe ylym-bilim, iş we eklenç gözlegindäki ýüzlerçe müň türkmenistanlynyň öýüne öwrüldi. Indi bolsa, Türkmenistanyň Daşary işler ministrligi türkmen tarapynyň Türkiýe respublikasynyň döwletinden türkmenistanly raýatlar üçin “wagtlaýyn esasda dürli görnüşli wiza düzgüniniň girizilmegini” sorandygyny mälim edýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.