Marynyň häkimiýetleri hojalyklara çekilen goşmaça suw turbalary üçin jerime ýazýar
"Baýramaly etrabynyň Mekan geňeşliginde 'Maryagyzsuw' edarasynyň işgärleri öýlere aýlanyp, iki sany agyz suw turbasy çekilen hojalyklara 1500-2000 manat aralygynda jerime salýarlar. Olar jerimäniň sebäbini 'turbanyň ikinjisini gizlin we bikanun ulanypsyň' diýip düşündirýärler" diýip, geňeşligiň bir ýaşaýjysy anonimlik şertinde 25-nji iýulda gürrüň berdi.
Habarçymyz bilen söhbetdeş bolan oba ýaşaýjylarynyň ençemesi bolsa, öz hojalyklaryna diňe gyş paslynda suw berilýändigini, galan ýaz, tomus we güýz aýlarynda suwuň asla akmaýandygyny aýdyp, özlerine salynýan jerimä nägilelik bildirýär.
"Biz olara suwuň diňe gyşda berilýändigini, onda hem suwy hojalykdan başga hiç zada ulanyp bolmaýandygyny, ekine suw tutup girdeji hem alyp bolmaýandygyny düşündirmäge synanyşdyk. Ýaz, tomus we güýz pasyllarynda suw maşynlaryna pul berip, suwy getirýändigimizi we ony howuzymyza guýup içýändigimizi hem görkezdik. Ýöne suw edarasynyň işgärleri hiç kimi diňlemedi" diýip, ýaşaýjy aýtdy.
Şol bir wagtda, oba ýaşaýjylary suw edarasynyň käbir işgäriniň para almak şerti bilen, hojalyklaryň käbirine jerime ýazmandygyny hem gürrüň berdiler.
"Olar bize '200 manat berseň, biz ikinji turbaňyzy görmedik bolaly, ýöne bir-iki günden gijä galman aýryň. Diňe bir liniýa bolmaly' diýdiler. Biz 200 manat berip, 2000 manat jerime bermekden sypdyk" diýip, başga bir oba ýaşaýjysy anonimlik şertinde belledi.
Habarçymyz welaýatyň suw edarasynyň işgärleriniň hojalyklara çekilen ikinji suw turbalary üçin jerime ýazmak çäresiniň etraplaryň aglabasynda, şeýle-de Mary we Baýramaly şäherlerinde hem dowam edýändigini aýtdy.
"Mary we Baýramaly şäherlerinde köp gatly jaýlaryň ýer zeminlerinden çekilen suw turbalary ulanýan hojalyklar bar bolsa, olara hem jerime salynýar" diýip, habarçy belledi.
Azatlyk bu aýdylanlar barada "Maryagyzsuw" edarasyndan kommentariýa almaga synanyşdy. Ýöne redaksiýamyzyň 25-nji iýulda eden telefon jaňlaryna hiç kim jogap bermedi.
Türkmenistanyň dürli sebitlerinde içimlik agyz suwunyň we ekerançylyk suwlarynyň üpjünçiligindäki bökdençlikler ýyllarboýy dowam edip gelýär. Türkmen hökümeti ýurtda suw üpjünçiligi bilen bagly bar bolan problemalary aç-açan boýun almaýar, ýöne inkär hem etmeýär.
"Marynyň häkimiýetleriniň häzirki çäreleri sebitiň suw üpjünçiligindäki problemalary, şol sanda suwuň bikanun we bisarpa ulanylmagynyň öňüni almak tagallalary ýaly bolup görünýär" diýip, maryly ýaşaýjy aýtdy.
Bu maglumatlar, Azatlygyň Lebap welaýatyndaky habarçylarynyň ýurduň dürli sebitlerinde arassa agyz suwlarynyň tygşytsyz ulanylýandygyny, edara-kärhanalara berkidilen agaç-nahallarynyň agyz suwy bilen suwarylýandygyny habar bermeginiň yz ýanyna gabat geldi.
Soňky aýlarda ýurtda suw üpjünçiligi bilen bagly mesele hökümet derejesinde ençeme gezek gozgaldy we munuň bilen bagly goňşy ýurtlaryň häkimiýetleri bilen birnäçe ylalaşyga hem gelindi.
Türkmenistanyň suw üpjünçiligi bilen bagly problemalaryna halkara guramalarynyň hasabatlarynda hem üns çekildi. BMG-niň Azyk we oba hojalyk boýunça edarasynyň soňky hasabatynda Türkmenistanda suwdan peýdalanmagyň geriminiň “aýgytly” derejä ýetendigi duýduryldy. Guramanyň geçen ýylyň awgustynda ýaýradan hasabatyna görä, ýurtda suw resurslaryna çenden aşa agram düşýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.