Arrestohet ish-presidenti kirgiz pas bastistjeve
Forcat speciale të Kirgizisë kanë bastisur rezidencën e ish-presidentit të këtij shteti, Almazbek Atambaev dhe është raportuar ta kenë arrestuar atë, pas një nate me përleshje të dhunshme me mbështetësit e tij, që kanë lënë të vdekur një person dhe dhjetëra të tjerë të plagosur.
Mediat lokale, duke përfshirë, Interfax dhe 24.kg, kanë raportuar se Atambaev është marrë nga kryeqyteti Bishkek dhe tani po dërgohet në selinë e ministrisë së Brendshme.
Korrespodentët e Radios Evropa e Lirë, që kanë arritur të konfirmojnë vetë arrestimin, kanë thënë se policia ka përdorur granata dore dhe gaz lotsjellës për të hyrë në ndërtesë, ku qindra mbështetës të tij ishin mbledhur.
Ata kanë thënë se janë dëgjuar edhe të shtëna me armë zjarri.
Arrestimi i tij ka ardhur pas një bastisjeje të dështuar për të ndaluar 62-vjeçarin, i cili përballet me pesë akuza penale për abuzim me pushtetin, në kohën sa ka qenë president i Kirgizisë nga viti 2011 deri më 2017.
Atambaev në anën tjetër mohon këto akuza.
Gjatë tentimeve të dështuara për ta bastisur rezidencën e tij, gjashtë zyrtarë të forcave speciale janë marrë peng nga mbështetësit e ish-presidentit.
Një ditë më vonë, përkatësisht më 8 gusht, ata janë liruar.
Presidenti aktual, Sooronbai Jeenbekov dhe Atambaev, që dikur kanë qenë aleatë, kanë fajësuar njëri-tjetrin për skenat e përgjakshme.
Duke folur në një seancë të jashtëzakonshme, në Këshillin për Siguri Kombëtare, Jeenbekov, ka thënë se Atambaev ka përgjegjësi të plotë për dhunën që ka rezultuar me një person të vdekur.
“Duke rezistuar ndaj masave të marra sipas ligjit, Almazbek Atambaev ka shkelur rëndë kushtetutën dhe ligjet e Kirgizisë”, ka thënë Jeenbekov.
“Nëse deri dje ai është kërkuar për t’u intervistuar si dëshmitar, tani ai do të trajtohet si dikush që akuzohet për kryerje të një krimi të rëndë”, ka shtuar ai.
Çfarë ndodhi më 7 gusht?
Në orët e vona të 7 gushtit, autoritetet janë nisur drejt ish-presidentit për ta marrë në pyetje për një hetim të paspecifikuar, mirëpo aty janë përballur me rezistencë të mbështetësve të Atambaevit.
Ai i ka cilësuar tentimet për ta arrestuar atë si jokushtetuese dhe joligjore, si dhe u ka thënë gazetarëve se është Jeenbekov dhe qeveria e tij që mbajnë përgjegjësi për këtë dhunë, sepse kanë qenë ata që kanë nisur bastisjen.
“Dje ata nuk kanë thënë se do të më marrin në pyetje, ata kanë hyrë si gangsterë dhe kanë nisur të shtëna ndaj njerëzve. Për një apo dy muaj e kam thënë se do të përdor armët për ta mbrojtur veten nëse dikush tenton të hyjë në shtëpinë time. Unë kam revole që e kam pranuar si dhuratë bashkë me një pushkë”, ka thënë Atambaev.
Ai ka thënë se ka qenë i gatshëm të nisë përgjigjje me shkrim mirëpo “autoritetet nuk u janë përgjigjur thirrjeve sepse nuk ka pasur korrupsion”.
Përveç pjesëtarit të forcave speciale që ka vdekur nga plagët e marra, ministria e Shëndetësisë ka thënë se 15 policë gjenden në mesin e 80 personave të plagosur si pasojë e përleshjeve.
Refuzim për intervistim
Jeenbekov dhe Atambaev kanë nisur akuza për jokompetencë ndaj njëri-tjetrit për muaj.
Bastisja ka ardhur pasi, zëvendës- ministri i Brendshëm, Mirlan Kanimetov dhe një varg zyrtarësh tjerë kanë vizituar ish-presidentin më 22 korik, mirëpo ai ka përgjigjur të përgjigjet për herë të tretë.
Sipas ligjit kirgiz, një person që refuzon ta zbatojë ligjin dhe dy thirrje për intervistim, mund të ndalohet me forcë.
Parlamenti i këtij shteti ka votuar më 27 korrik për heqje të imunitetit për ish-presidentët që duhet të përballen me ligjin.
Kirgizia është përballur me një proces të lehtë dhe paqësor të transferimit të pushtetit nga Atambaev te Jeenbekov, që është mirëpritur nga komuniteti ndërkombëtar.
Ish-republika sovjetike mbetet e afërt me Rusinë, e cila ka një bazë ushtarake në qytetin verior të Kirgizisë, Kant.
Muajin e kaluar, Atambaev ka urdhëtuar me aeroplan privat drejt Moskës, për t’u takuar me presidentin rus, Vladimir Putin.
Pas takimit, Putin ka bërë thirrje për stabilitet politik dhe unitet në Kirigizi.
Përgatiti: Krenare Cubolli