Austria do të ashpërsojë dënimet për sulmet kundër grave
Konservatorët e koalicionit në pushtet në këtë shtet, kanë fituar udhëheqësinë gjatë kohës së krizës së migrantëve, duke u zotuar se do të parandalojnë fluksin e refugjatëve të vitit 2015, shumica e të cilëve kishin prejardhje nga Lindja e Mesme apo Afganistani.
Të dhënat e fundit sa u përket krimeve në vitin 2017, kanë treguar ulje të numrit të krimeve të dhunshme.
Bazuar në këto të dhëna, del se Austria ka shkallën më të ulët të vrasjeve në Bashkimin Evropian.
Megjithatë mediat në Austri kanë thënë se Qeveria ka të dhëna për tetë vrasje të grave këtë vit, për të cilat policia beson se janë kryer nga të huajt.
“Ne kemi parë që në fillim të këtij viti jemi përballur me një numër të vrasjeve në shtetin tonë”, ka thënë ministri i Brendshëm austriak, Herbert Kickl, duke bërë të ditura masat e planifikuara.
“Ne kemi vërejtur se shumë, shumë shpesh, njerëzit e përfshirë në këto krime të dhunshme nuk janë austriakë dhe janë nga kultura dhe shtete tjera”, ka thënë Kickl në një konferencë për media, bashkë me kancelarin e këtij shteti, Sebastian Kurz dhe ministra tjerë.
E gjithë pakoja e masave, që përfshin rritjen e minimumit të dënimit për dhunim, nuk shënjestron ndaras të huajt.
Kurz ka hedhur poshtë kritikat e avokatëve dhe personave të tjerë që kanë thënë se dënimi më i ashpër nuk është ndalesë efektive për këto krime.
“I kuptoj tejet pak kritikat e disa ekspertëve për planet, të cilat sipas mendimit tim janë të drejta. Kushdo që kryen një vepër penale kundër grave apo fëmijëve në Austri nuk meriton asgjë tjetër përveç ndëshkimit të ashpër”, ka thënë ai.