بلومبرګ: طالبانو له چین او پاکستان سره د یو کمربند او افغانستان ته د یوې لارې د پروژې غځول منلي
بلومبرګ:
بلومبرګ خپرونې چې د امریکا له متحدو ایالتونو خپرېږي په دې باب لیکنه خپره کړې، چې طالبانو له چین او پاکستان سره ومنله چې د یو کمربند او یوې لارې لویه پروژه به افغانستان ته غځول کېږي.
له دې سره د لیکوال په باور په افغانستان کې چې بندیزونو ځپلی پر زېربنايي پروژو د لګولو لپاره په میلیاردونو ډالره جلب شي.
د چین د بهرنیو چارو وزیر چین ګانګ او د هغه پاکستاني ساري بلاول بوټو زرداري د شنبې په ورځ په اسلام اباد کې سره وکتل او ژمنه یې وکړه چې د افغانستان د بیارغونې په چارو له دې جملې د چین او پاکستان په اقتصادي دهلېز کې به د طالبانو تر ولکې لاندې افغانستان ته ونډه ورکوي.
دغه پروژه چې په CPEC مشهوره ده، ارزښت یې ۶۰ ميلیارد ډالرو ته رسېږي.
د طالبانو د بهرنیو چارو سرپرست وزیر مولوي امیر خان متقي هم، د پاکستان او چین د بهرنیو چارو له وزیرانو سره جلا- جلا کتنې درلودې.
د چین او پاکستان چارواکو تر دې مخکې افغانستان ته هم د دې پروژې د غځولو په باب خبرې کړې وې.
د یوه کمربند یوې لارې په نوم دغه ابتکار د چین د ولسمشر شي جین پینګ په نوښت پیل شوې پروژه ده، چې نږدې لسیزې مخکې یې کارونه پیل شول.
د چین او پاکستان اقتصادي دهلېز د دې لویې پروژې یوه برخه ده.
د بلومبرګ خپرونې په وینا، د طالبانو حکومت چې له مالي ستونزو سره مخامخ دی، په دې پروژه کې ونډې اخیستې ته چمتووالی ښوولی او پر اساسي پروژو د پانګونې جلب ته یې لېوالتیا ښودلې ده.
د لیکوال په باور طالبانو دغه راز هیلهمندي ښوولې، چې چین د افغانستان پر طبیعي زېرمو چې ارزښت یې یو تریلیون ډالره اټکل شوی پانګونه وکړي.
د طالبانو حکومت په جنورۍ میاشت کې خپل یو قرارداد د چین د پټرولیم له ملي شرکت سره لاسلیک کړ، چې دغه شرکت د افغانستان د امو سیند له حوزې تېل استخراج کړي.
داسې راپورونه ورکړل شوي چې د چین ګوچین شرکت د طالبانو له حکومت سره منلې څو په افغانستان کې د لیتیوم پر زېرمو به ۱۰ ميلیارد ډالره پانګونه کوي.
انډین اکسپرس:
له هنده خپرېدونکې ورځپاڼې انډین اکسپرس هم د چین او پاکستان د اقتصادي دهلېز په باب لیکنه خپره کړې چې اوس پهکې د افغانستان د ورګډولو پر لارو چارو بحث کېږي.
د انډین اکسپرس په لیکنه، د شنبې په ورځ د چین او پاکستان د بهرنیو چارو وزیرانو پرېکړه وکړه چې دواړه لوري به د افغانانو بشري او اقتصادي لاسنیوي ته دوام ورکوي.
د پاکستان د بهرنیو چارو وزارت په یوه اعلامیه کې ویلي، دواړه لوریو موافقه وکړه چې په افغانستان کې به پرمختیايي همکاري زیاتوي، دغه راز د چین او پاکستان د اقتصادي دهلېز پروژه به افغانستان ته هم غځوي.
که څه هم د نړۍ یوه هېواد هم د طالبانو حکومت په رسمیت نهدی پېژندلی، خو چین او پاکستان هغه دوه هېوادونه دي چې له طالبانو سره نږدې اړیکې لري او طالبانو دواړو هېوادونو ته خپل ډیپلوماتان لېږلي دي.