کابل کې معترضې مېرمنې: طالبان دې ښځو ته په دولتي ادارو کې دندې ورکړي
دغه مېرمنې او نجونې چې د (ځواکمنو مېرمنو د اصلي خوځښت) غړې وې، د کابل په شهرنو پارک کې راټولې شوې وې.
دوی خپل تحصیلي اسناد هم له ځانونو سره راوړي وو.
ددغه خوځښت مشرې مونسې مبارز د دغه اعتراض په اړه ازادي راډیو ته وویل، د اعتراض کوونکو شمېر لسګونو ته رسېده.
اغلې مبارز وويل: "پیغام دا و چې موږ په ظرفیت، تحصیل او دانش سره د خپلو حقونو غوښتونکي یو. زموږ ادعا دا ده چې موږ د افغانستان په تول سیاسي او ټولنیز جوړښتونو کې د ګډون غوښتنکي یو، زموږ پیغام دا و چې موږ په ظرفیت او دانش سره غواړو ګډون ولرو، نه په ټوپک او وسلې."
اغلې مبارز وویل، د افغان مېرمنو په وړاندې روان حالت د اندېښنې وړ دی.
د يادې اعتراضیه غونډې بله ګډونواله ژولیا پارسي بیا وايي، چې طالبانو د دوی د اعتراض مخه ونیوله.
نوموړې وويل: "دوی موږ ته اجازه رانهکړه چې اعتراضیه غونډې ته دوام ورکړو، د دوی له مربوطه حوزې کسان راغلل او اسنادونه یې چک کړل."
د نوموړې د دې ادعا په اړه مو د طالبانو حکومت د کورنیو چارو د وزارت د ویاند عبدالنافع ټکور او د کابل امنیه قومندانۍ لپاره د طالبانو د حکومت ویاند خالد ځدران وپوښت خو د راپور تر خپرېدو پورې یې ځواب رانهکړ.
د یادونې ده، چې تېره ورځ د بدخشان پوهنتون نجونو محصلانو هم له دې امله لاریون کړی و، چې د دوی په خبره د چادریو د نه لرلو له امله پوهنتون ته دننه نه وې پرېښودل شوې.
د طالبانو د امر بالمعروف وزارت پرون ازادي راډيو ته ویلي و، دا کار د یاد پوهنتون د ارشاد کمېټې لهخوا شوی و.
د بښنې نړیوال سازمان د افغان څانګې کمپاینرې سمیرا حمیدي او د افغانستان د بشري حقونو د خپلواک کمېسیون پخوانۍ مشرې شهرزاد اکبر په بدخشان ولایت کې د لاريون کوونکو محصلینو سره د طالبانو تاوتریخوالی غندلی دی.
د یادونې ده، چې په افغان نجونو او ښځو د حجاب اجباري کول، له شرعي محرم پرته پرې د لرې واټن سفر او له شپږم ټولکي پورته د زدهکړو بندیز او دغه شان په ډېری دولتي ادارو کې له کار نه د ښځو راګرځول هغه محدویتونه دي چې په تېر یو کال کې طالبانو په افغان مېرمنو او نجونو لګولي دي.
دا محدودیتونه په افغانستان کې دننه او بهر له پراخونو غبرګونونو سره مخ شوي دي.