د کابل د مهمو تاریخي او فرهنګي سیمو د ساتلو او رغولو هڅې پیل شوي

د کابل د تاریخي، فرهنګي او عامه سیمو د ساتنې او رغونې لپاره د طالبانو د رییس الوزرا له خوا ګومارل شوې کمېټې پرون پنجشنبې خپله لومړنۍ غونډه وکړه.


د طالبانو د اطلاعاتو او فرهنګ وزارت د فرهنګ او هنر مرستیال مولوي عتیق الله عزیزي چې د دې کمېټي مشري کوي ژمنه وکړه چې دغه کمېټه به د چاپېریال ساتنې په هدف کوټلي ګامونه واخلي.


د طالبانو تر کنټرول لاندې د باختر خبري اژانس د خبر له مخې د کمېټې غړو د کابل سیند پر ګډون د مهمو تاریخي او فرهنګې سیمو د بیا رغولو په تړاو بحث وکړ او ژمنه یې وکړه چې د هرې سیمې تاریخي او فرهنګي ارزښتونو ته په پام سره به مهم ځایونه ورغول شي او د تاریخي ارزښتونو خلاف کارونو مخه به ونیول شي.


په دغه کمېټه کې د ښار جوړولو وزارت، کابل ښاروالۍ، چاپېریال ساتنې ادارې او د اغا خان فرهنګي بنسټ استازي شامل دي.