له پنجاب پوهنتون وړل شوی زده کوونکی، بيبګر امداد بلوچ خوشې شو
د هغه لپاره احتجاج کوونکي بلوچ سټوډنټس کونسل مشرانو د مې په لسمه په يوه خبرپاڼه او وروسته په يوه خبري غونډه کې وويل چې بیبګر امداد بلوچ خوشې شوی دی. دوی په خپله خبرپاڼه کې د دغه زده کوونکي د وړونکو سرتيرو لپاره د اغواکارو يا تښتونکو لفظ کارولی او زیاته کړې یې ده چې: "ایا څوک به له اغواکارو پوښتنه وکړای شي چې بیبګر امداد بلوچ یې ولې په غيرقانوني ډول د پوهنتون له هاسټله ويوړ؟"
کونسل د پاکستان له حکومته غوښتنه کړې چې د جبريلادرکه کولو د مسلې مستقل حل دې راوباسي. دوی زیاته کړې چې تر څو د دې مسلې دايمي حل نه وې راویستل شوی، بلوچ زده کوونکي به خوندي احساس نه کوي.
بیبګر امداد بلوچ د بلوچستان د تربت سیمې سره تعلق لري. هغه د اسلام اباد په نمل پوهنتون کې د انګلش ادبیاتو زده کوونکی دی. د اپريل په ۲۷مه هغه مهال امنيتي ځواکونو له پنجاب پوهنتونه د ځان سره ويوړ چې نوموړی د دوستانو سره ملاقات لپاره ورغلی وو. دغه وخت د پنجاب پوهنتون انتظامیې ويلي وو چې دوی سره ژمنه شوې چې که بیبګر امداد بې قصوره وو نو له پوښتنو ګرويږنو وروسته به خوشې به شي.
د بیبګر امداد بلوچ د نيول کېدو ويډيو هم رسنيو ته وتلې وه او پر انټرنيټ ډيره مشهوره شوې وه. تر دې وروسته بلوچ سټوډنټس کونسل مظاهرې پېل کړي او د پوهنتون له انتظامیې یې وغوښتل چې بلوچان دې د قام په بنياد نه ځورول کيږي. د دوی سره په دې احتجاج کې د زده کوونکو ځينې نورې اتحادیې لکه پروګریسیو سټوډنس او سند سټوډڼس هم شامل شوي وو.
تر اوسه د پاکستان وفاقي او د پنجاب صوبايي امنيتي ادارو د بیبګر امداد بلوچ د نيولو په اړه څه نه دې ويلي خو د پاکستان ډان ورځپاڼې د امنيتي سرچينو په حواله ليکلي چې نوموړی د کراچۍ پوهنتون په خوله کې پر چينايانو د ځانمرګې برید په تړاو د پوښتنو لپاره نيول شوی وو.
د چيناينو پر يو کلتوري مرکز شوې دې حملې چې ۳ چينايان او يو پاکستانی پکې ووژل شول، زمه واري له پاکستانه ازادي غوښتونکې ډلې، بلوچ ليبرېشن ارمي منلې وه. دې ډلې په يو بيان کې ويلي وو چې دا ځانمرګې حمله د شاري بلوچ په نامه يوې ښځې کړې چې په دې توګه د يوې بلوچ مېرمن لومړی داسې برید دی.
د پاکستان وزيراعظم شهباز شريف د اپرېل پر ۱۱مه تر خپلې ټاکنې ۱۲ ورځې وروسته کوټې ته تللی وو او هلته یې د ورکو کسانو له کورنيو سره ژمنه وکړه چې دا مسله به څېړي. هغه زیاته کړې وه چې په دې اړه به "له بااختیاره کسانو" سره خبرې کوي.
د بښنې نړيوال سازمان ایمنسټي انټرنیشنل د مارچ پر ۲۹مه په خپل کلني راپور کې ويلي ول چې په پاکستان کې په زور د خلکو ورکولو تور پر امنيتي ځواکونو پورې کېږي او هغوی دا واک لري چې خلک خوشې کړي. د دوی په وينا، له امنيتي ځواکونو باید "حساب وغوښتل" شي ځکه چې په وينا یې که د حساب ورکولو ویره نه وي نو دا مسله به همداسې ناحله پاتې وي.
د پاکستان پوځ دريځ لري چې غيب کړل شوي بلوچان په زرګونو کې نه دي. د دوی وياندانو په بېلابېلو وختونو کې ويلي چې ځيني لادرکه بلوچان په جګړو کې وژل شوي. په ۲۰۱۹ کال کې د پوځ د هغه وخت وياند، مېجر جنرل اصف غفور ويلي وو چې نه غواړي څوک په زوره ورک کړي خو په "جنګ کې هر څه جايز" دي.