امریکایانو سږکال د خپلواکۍ ورځ په پرېډونو او اورلوبو ولمانځله
د خپلواکۍ د ورځې سږنۍ لمانځنې د تېر کال سره څرګند توپیر درلود، ځکه هغه وخت د 'کووېډ-۱۹' د محدودیتونو له کبله ډېر مراسم لغوه شوي وو.
تر یو کال د زیاتې مودې ټولنیز واټن، د کاروبارونو له تړل کېدو، ټولبندۍ او د کرونا وبا له کبله د نورو لګېدلو بندیزونه وروسته، امریکایانو سږ کال دا فرصت ترلاسه کړی و چې د جولای ۴مه، د دې هېواد د خپلواکۍ ورځ له خپلو دوستانو او کورنیو سره ولمانځي.
که څه هم د امریکا متحده ایالات د کرونا ضد واکسین په برخه کې هغه هدف ته چې د جولای تر ۴مې نېټې جمهور رئیس بایډن ټاکلی و او له مخې یې باید د امریکا ۷۰ سلنه لویانو لږ تر لږه دا واکسین یوه ستن کړې وه نهدي رسېدلي، خو بیا جمهور رئیس بایډن په ټول هېواد کې د خپلواکۍ د ورځې د لمانځلو لپاره خلک هڅولي وو.
په امریکا کې تر اوسه پورې د واکسین ۱۸۰ ملیونه ستنې شوې دي چې د دې هېواد د لویانو لږ تر لږه ۶۷ سلنې، حداقل د واکسین یو دوز اخیستی.
بایډن په سپینه ماڼۍ کې د خپلواکۍ د ورځې په مناسبت مراسمو ته د تېر کال یادونه وکړه چې دا لمانځنې پهکې د کرونا وبا له کبله لغوه شوې وې او زیاتهیې کړه چې سږکال امریکا "پر ویروس لاسبری ترلاسه کړی"، خو نوموړي دا هم وویل چې 'کووېډ-۱۹' لا لهمنځه نهدی تللی او د ډلټا زر خپرېدونکې بڼهیې په زیاتېدو ده.
په لندن کې بیا ملکې ایلزابت د یکشنبې په ورځ د دې هېواد د روغتیايي کارکوونکو قدرداني وکړه او د بریتانیا د روغتیايي خدمتونو ادارې تهیې د جورج کراس اېوارډ (جایزه) ورکړ چې د بریتانیا تر ټولو لوړ ملکي اېوارډ دی.
دا اېوارډ د بریتانیا د ملي روغتیايي خدمتونو ادارې ته د کرونا د وبا پر ضد د مبارزې سربېره د دې ادارې د ۷۳ کلنو هڅو په درناوي ورکول شوی.
د بریتانیا صدراعظم بورېس جانسون ویلي دا اېوارډ دې ادارې ته د ټول ملت د درناوي سمبول دی.
په نړۍ کې ګڼ نور هېوادونه هم هڅه کوي چې د کرونا ویروس خپرېدل کنټرول کړي.
روسیې د یکشنبې په ورځ تر ۲۵ زرو زیاتې نوې پېښې ثبت کړي. دا د جنورۍ میاشتې راهیسې په دې هېواد کې د کرونا د تازه پېښو تر ټولو لوړه شمېره ده.
اندونیزیا د جولای په څلورمه نېټه ۲۷ زره ۲۳۳ نوې پېښې ثبت کړي چې ورسره په دې هېواد د کرونا د ټولو پېښو شمېر له ۲،۲ ملیونو پورته شو.
د کرونا دوهمې څپې د اندونیزیا په جاوا او بالي ټاپوګانو کې پر روغتونو فشار زیات کړی دی، دغلته د جولای له ۲۰مې نېټې نیمه ټولبندي اعلانېږي.