د ارمنستان په پلازمېنه کې نن هم مظاهرې روانې دي
په ارمنستان کې د صدراعظم په توګه د پخواني جمهور رئيس سرژ سرکسیان تر ټاکل کېدو وروسته، نن جمعه یو وار بیا د هغه هېواد په پلازمېنه یرووان کې مظاهرې دي.
چارواکو مظاهره چیانو ته د خبرو وړاندیز کړی دی.
په یرووان کې نن اتمه ورځ ده چې سلګونه مظاهره چیان، د اپوزسیون د مشر نیکول پاشینیان په بلنه، لارو ته راوځي او د ښار د مرکز پر لور مارش کوي.
پاشینیان پرون په یرووان کې لس زره کسانو ته چې د ښار پر جمهوریت څلور لارې راغونډ شوي وو، وویل چې نن په یرووان کې ټولې لارې بندې کړي او خپل اعتراض جاري وساتي.
پاشینیان وویل:
"موږ یوڅو کسان وو، خو اوس څلوېښت زرو ته رسېدلي یوو، نو معلومېږي چې زموږ ټول ولس بدلون غواړي."
د ارمنستان ولسمشر هغوی ته د مذاکرو وړاندیز کړی دی.
په یرووان کې پولیسو پرون لږترلږه ۱۲۰ تنه اعتراض کوونکي ونیول او د خلکو د خورولو لپاره یې پرهغوی اوبه وپاشلې.