Тајани: Договорот за мигрантите со Албанија е неспоредлив со планот на Британија и Руанда
Тој исто така додаде дека начинот на кој ќе се решаваат барањата целосно ќе ги заштити правата на бегалците.
Претходно овој месец, владата предводена од Џорџа Мелони го објави планот за запирање на растечкиот егзодус на мигрантите од Африка и да се намали притисокот врз центрите во Италија.
Италија ќе изгради два прифатни и притворени логори во Албанија кои ќе можат да примат најмногу 3000 мигранти во исто време. Ова е прв договор кој вклучува земја која не е членка на ЕУ која прифаќа мигранти во име на земја-членка.
Во 2016 година, Унијата постигна договор со Турција да ги спречи луѓето да пристигнуваат илегално.
„Мигрантите ќе бидат третирани во согласност со италијанските и европските стандарди“, рече министерот за надворешни работи Антонио Тајани на седницата на долниот дом на парламентот, каде се расправаше за договорот, што наиде на критики од левичарската опозиција и групите за човекови права.
„Овој протокол не е споредлив со договорот меѓу Велика Британија и Руанда“, рече Тајани, отфрлајќи ги споредбите меѓу италијанската иницијатива и британската, кои врховните судии на Британија ги прогласија за незаконски.
Во планот на Албанија и Италија пишува дека камповите ќе работат под италијанска јурисдикција и дека треба да бидат отворени пролетта 2024 година.
Тајани им порача на пратениците дека Италија ќе ги покрие сите трошоци, вклучително и изградбата и надзорот на центрите, а за првичните трошоци ќе плати 16,5 милиони евра.
Опозициските пратеници ја повикаа Мелони да побара одобрение од парламентот за договорот што го преговарала со албанскиот премиер Еди Рама, откако владата рече дека тоа не е строго обврзано според италијанскиот закон.
Сепак, Тајани, наследникот на поранешниот премиер Силвио Берлускони на чело на Форца Италија, рече дека администрацијата ќе поднесе предлог-закон за формално ратификување на договорот со Албанија.
Околу 150.000 мигранти пристигнале во Италија по морски пат оваа година, во споредба со околу 94.000 во истиот период во 2022 година.