Ерменија ја обвини Турција дека поставува нови услови за нормализација на односите

Ерменскиот министер за надворешни работи Арарат Мирзојан ја обвини соседна Турција дека поставува „нови услови“ за нормализација на односите меѓу двете земји. Во интервју за францускиот дневен весник „Фигаро“ за време на посетата на Париз, Мирзојан рече дека Ерменија е подготвена за нормализацијана односите со Анкара и покрај „огромната турска поддршка“ за Азербејџан за време на борбите во 2020 година за отцепениот азербејџански регион Нагорно-Карабах.


„Добивме позитивни сигнали од Турција за повторно отворање на дијалогот, но тој и понатаму е комплициран. Анкара поставува нови услови. Меѓу нив е „коридор“ што ги поврзува Азербејџан и (азербејџанската ексклава) Нахичеван“, изјави тој.

Отворањето на транспортните врски во регионот беше дел од договорот за прекин на огнот, постигнат со посредство на Русија, кој стави крај на 44-дневните борби меѓу Азербејџан и Ерменија минатата година, вклучувајќи го и пристапот до Нахичеван.


Ерменскиот премиер Никол Пашинијан ја отфрли, како што ја нарекува, „логиката на коридорот“ за решавање на прашањата, додека Мирзојан за „Фигаро“ изјави дека барањето за „екстратериторијален“ коридор не доаѓа предвид.


„Државите мора да дозволат транзит додека го одржуваат суверенитетот над нивната територија. Сите транспортни врски во регионот мора повторно да се отворат“, истакна Мирзојан.


Турција долго време беше клучен регионален сојузник на Азербејџан и ја држеше својата граница со Ерменија затворена речиси три децении, поради окупацијата на Нагорно-Карабах и околните региони од страна на Ерменија, прашање што беше решено со договорот за прекин на огнот.



Ердоган- Турција е против државен удар во Ерменија


Мирзојан, исто така, рече дека ситуацијата околу Нагорно-Карабах останува напната, обвинувајќи го Баку дека го одолговлекува прашањето за ослободување на ерменските воени заробеници. Тој повика на итно продолжување на разговорите под покровителство на Минск групата на Организацијата за безбедност и соработка во Европа (ОБСЕ).


„Секако, прашањето за конечно решавање на конфликтот останува на дневен ред“, рече тој. „Но, во оваа фаза се согласивме да одиме напред со преземање мали чекори, како што е обезбедувањето ослободување на воените заробеници и пристапот на меѓународните организации – вклучително и УНЕСКО – до Нагорно-Карабах за хуманитарни цели“. додаде Мирзојан.