МНР го осуди терористичкиот напад во Виена
Министерството за надворешни работи на Македонија го осуди синоќешниот терористички напад во Виена
„Тоа е трагичен удар за еден од најбезбедните градови во Европа. Ја споделуваме болката со нашите австриски и европски пријатели. Тероризмот не признава ниту нација, ниту религија, ниту потекло, и ние строго го осудуваме овој терористички чин, без разлика од кого е сторен“, стои во реакцијата од МНР.
Министерството изразува сочувство до семејствата и граѓаните на Австрија.
„ Република Северна Македонија и како членка на НАТО, и како земја – кандидат за членство во Европската Унија, активно придонесува кон меѓународната коалиција за борба против тероризмот од било каков вид“, се наведува во реакцијата на МНР.
Австриското МВР потврди - Напаѓачот во Виена е Кујтим Фејзулаи и имал македонско државјанство
Во нападите во центарот на австриската престолнина Виена, беа убиени четири лица, а најмалку 15 беа повредени. Австрискиот министер за внатрешни работи Карл Нехамер денеска соопшти дека нападите ги изврши 20-годишник кој имал двојно државјанство на Австрија и на Северна Македонија. Тој го нарече напаѓачот „терорист“.