Дерковски – Многу луѓе по телефон барале нешто од мене, но сум постапувал по закон

Претседателот на ДИК, Оливер Дерковски, чие име денеска се слушна во судницата во Кривичниот суд во еден од разговорите што беа презентирани на судењето за случајот „Титаник“, изјави дека секогаш работел во согласност со позитивните законски прописи и дека не знае точно за кој и за каков разговор станува збор бидејќи сè уште ги нема материјалите.


„Да, слушнав и јас дека се споменало моето име. Не сум чул, не сум преслушал, не сум видел како точно тоа било. Меѓутоа, можам да ви кажам дека во изминатите години сум се слушал со многу луѓе на телефон, сум зборувал, и луѓе барале од мене нешто и секакви идеи постоеле, меѓутоа јас можам да кажам одговорно дека секогаш сум постапувал согласно позитивните законски прописи. И сигурно сум постапил и тогаш кога од мене се барало можеби нешто што не е во согласност со законот“, рече Дерковски.


Ова, според него, нема да има никакво влијание врз неговата работа во ДИК.


„Кај мене воопшто нема влијание во мојата работа во ДИК, а доколку имал некој таква намера тоа е негов проблем. Значи, на мене не може да влијае затоа што јас во текот на мојот цел работен век работам, функционирам почитувајќи ги законите на Република Македонија и ќе продолжам така, а кои се намерите не би навлегувал. Се работи за судска постапка и не е добро да коментираме“, рече Дерковски.