Шилегов-Каминис: Затворање на прашањата меѓу Македонија и Грција

Строго ќе се ограничиме на нашата улога, на соработката меѓу двата градови за да испратиме порака дека соработка со градот Скопје е најдоброто нешто што можеме да го направиме во овие околности, изјави градоначалникот на Атина Јоргос Каминис во пресрет на утрешната средба со градоначалникот на Скопје Петре Шилегов во грчкиот главен град.


Каминис за грчки медиум отфрла секаква можност со Шилегов да разговараат за политичките случувања и разговорите за името.


Тие по повод утрешната средба во денешна официјална објава во дневни весници во двете земји, повикуваат на зближување на двата града и затворање на отворените прашања меѓу Македонија и Грција.


Тие наведуваат дека во изминатите неколку недели беа направени важни чекори и важен моментум за решавање на спорот за името кој ги дели двете држави со децении.


„Ние како градоначалници на главните градови на двете земји ги здружуваме нашите гласови и го поддржуваме процесот што мора да води кон остварливо решение, а не кон ново разочарување, посочуваат во текстот Шилегов и Каминис.