На протестите во Иран загинале 25 луѓе, над 400 се притворени

Иранското обвинителство соопшти дека 465 луѓе се уште се притворени низ целата земја за учество на антидржавните протести кои започнаа пред три недели. Од обвинителството потврдија и дека во насилството на протестите што започнаа на 28 декември загинале 25 луѓе.


Техеранскиот обвинител изјави дека 440 учесници на протестите кои биле притворени се ослободени од притоворските одделенија низ Техеран само во последните денови, а 55 се уште се во притвор во главниот град.


Иранскиот парламент на 7-ми јануари соопшти дека обичните демонстранти, особено студентите, треба да бидат ослободени, но дека лидерите на протестите ќе бидат казнети. 


Протестите започнаа поради економските тешкотии со кои се соочуваат младите и работничката класа во Иран, а се развија против моќта и привилегиите на елитите, особено на врховниот лидер ајатолахот Али Хаменеи.