Добрецова: Коомчулук кийинки жылдын бюджетине көп кызыкпай жатат
Быйыл 2019-жылдын республикалык бюджетин талдаган кеңири коомдук талкуу жигердүү өтпөй жатат. Мындай пикирин "Азаттыкка" Өнүктүрүү саясат институтунун башкаруу төрайымы Надежда Добрецова билдирди.
- Учурда бюджет тууралуу чоң коомдук талкуу өтпөй жатканы бизди таң калдырат. Жарандык коомдун да кызыгуусу байкалбайт. Биз ачык булактардан алган маалыматка ылайык саламаттык сактоого жана социалдык коргоого каралган чыгымдар кыскартылганын көрүп жатабыз. Бул жарандар үчүн жакшы эмес көрүнүш. Бирок ошол эле учурда жаңы Бюджеттик кодекс күчүнө кирип, Финансы министрлиги бюджеттин структурасын өзгөрттү. Ошондуктан чындыгында кырдаал кескин өзгөрбөйт деген да пикир бар. Ошону талкуулоо үчүн биз кеңири талкуу уюштуруп жатабыз.
Өнүктүрүү саясат институту 30-ноябрда 2019-жылга республикалык бюджетти талкуулаган жыйын өткөрүүдө. Ага Финансы министрлигинин адистери жана журналисттер чакырылган.
Буга чейин финансы министринин орун басары Улук Карымшаков "Азаттыкка" сүйлөп жатып, 2019-жылдын бюджетинде негизги алты өзгөчөлүк бар экенин айткан. Биринчиси - ар бир министрликте же мекемеде бюджетти бөлүштүрүүчүлөрдүн укугу кеңири болот. Экинчиси - экономикалык классификациялардын саны азайып, алар 61ден 22ге чейин кыскарат. Ошентип ар бир бюджеттик мекеме-ишкана каржыны алууда жана колдонууда ыкчамдыкка жетишери күтүлүүдө.
Жогорку Кеңеш 15-ноябрда өлкөнүн келерки жылга бюджетин жана 2019-2020-жылдарга божомолун талкуулап, добуш берүүгө жөнөттү.
Мамлекеттик бюджеттин кирешесинин 2019-жылга жалпы көлөмү 170 млрд. сом же ички дүң өнүмдүн 28% деңгээлинде болжолдонуп жатканы айтылды. Тартыштык 10 млрд. сом өлчөмүндө каралууда.
Киреше салыгынын 50-70% жергиликтүү бюджетке калтыруу, сатуудан алынган салыкты экспортко кетип жаткан товарлардан алып салуу жагы да киргизиле турганы белгиленди. (KR)