Татарстан һәм Башкортостан арасындагы дуслык оешмасы рәисе Маузир Гыйниятуллин вафат
(Казан, 21 декабрь, "Татар-информ"). "Агыйдел" Татарстан һәм Башкортостан арасында дуслык һәм хезмәттәшлек иҗтимагый оешмасы рәисе Маузир Гыйниятуллин вафат. Бу хакта социаль челтәрдә аның улы, танылган саксофончы Артур хәбәр итә.
"Әтием! Бүген ул бездән китте. Дүшәмбе аны Чаллыдан соңгы юлга озатачакбыз, вакытын соңрак хәбәр итәрмен", - дип язган Артур. Ул әтисенең туган ягында - Азнакай районы Сарлы авылында җирләнәчәген язган. Артур язуынча, әтисенең сәламәтлек белән проблемалары булмаган. "Ул әни белән театрга барган, йөрәге тоткан, әни кулында вафат булган", - дип яза Артур.
Артур әлегә вакытта Дубайда булуын, иртәгә Татарстанга кайтачагын әйткән. "Миңа ярдәм кирәк, мин Дубайда үзем генә, самолет көтәм. Минем әти бик якты кеше иде, күп кешеләр гә булышты. Әти, мин сынатмам. Күп әйберләре әйтеп өлгермәдем, күп әйберләрне эшләп йлгермәдем. Дуслар, гомерләрнең, якыннарның кадерен белегез", - дигән ул.
Маузир Гыйниятуллин күпсанлы милли чараларны оештыруда катнашкан, талантлы яшьләрне үстерүгә зур өлеш керткән шәхес иде.