Казан мәктәбендә атыш оештырган Илназ Галәвиев кая югалган?
Казан гимназиясендә атыш оештырга Илназ Галәвиев югалды, дип язып чыкты матбугат чаралары, аның әтисенә сылтама белән. Әтисе әйтүенчә, Илназ Галәвиев аның белән инде 2 ай элемтәгә чыкмый икән.
РИА Новости, Оренбург өлкәсе буенча җәзаларны үтәү идарәсенә сылтама белән, бу мәгълүматның дөрес түгеллеген хәбәр итә.
«Галәвиев суд карары буенча билгеләнгән җәзаны төзәтү колониясендә дәвам итә. Аның яшәү шартлары законда каралган нормаларга җавап бирә. Җәза үтәүченең хокуклары бозылмады», – дип хәбәр итә идарә матбугат хезмәте. Аларның хәбәренә караганда, ул 4 декабрьдә якыннарына хат язган.
2021 елның 11 маенда 19 яшьлек Илназ Галәвиев 175нче гимназиягә һөҗүм итә, 7 баланы һәм 2 укытучыны атып үтерә, 24 кешене яралый.
13 апрельдә суд Галәвиевне гомерлеккә ирегеннән мәхрүм итте һәм 200 мең сум штраф салды. Ул Оренбург өлкәсендәге Соль-Илецк шәһәрендәге (Тоз күле) «Кара дельфин» («Черный дельфин») колониясенә җибәрелде.
«Кара дельфин» – аерым режимдагы иң зур колония, анда гомерлеккә ирегеннән мәхрүм ителгән иң куркыныч җинаятьчеләрне җибәрәләр. Ул халык яратып йөри торган Тоз күленнән ерак түгел. Аңа керү юлында кара төстәге дельфин скульптурасы бар. Колониядә җәза үтәүчеләрнең берсе, кеше үтерүче Владимир Криштопа, аны папье-машедан ясый, кара төскә буйый, чөнки башка төсләре булмый. Колония җитәкчелеге шундый ук скульптура ясата.
Бу колониядәге камералар бик кечкенә, анда һәрвакыт ут яна, җәза үтәүчеләр һава сулар өчен бары тик икенче камерага чыгарыла, хәрәкәт иткәндә алар бөкрәеп, идәнгә карап, кулларын артка тырпайтып, күзләре бәйләнгән хәлдә, «дельфин» позасында гына йөри. Камерада 2 кеше утыра, аларга бер-берсе белән сөйләшергә ярамый. Иртәнге 6да торалар, юыналар. Барысы да камерада. 6.30 – иртәнге аш, шул вакытта радио тыңларга ярый. Аларга кырынырга ярый. 8дә тикшерү башлана. Тоткыннар стенага карап баса, кулларын артка суза, үзләренең исемнәрен, ни өчен хөкем ителгәннәрен әйтә. Алар һәр сорауга: «Есть, гражданин начальник», – дип җавап бирергә тиеш. Аннары аларның кулларын богаулыйлар һәм камераны тикшерәләр.