Գրեթե բոլոր տեղերում ունենք քաղաքական կյանքի էրոզիա. պատահական չէ, որ աշխարհն այսօր դարձել է այսքան վտանգավոր. Ստյոպա Սաֆարյան
2017 թ. ընտրությունների ճակատագրական նշանակությունը չգիտակցվեց ոչ կառավարող դասի, ոչ էլ, ցավոք, հասարակության կողմից: Նման հայտարարություն է արել Միջազգային և անվտանգության հարցերի հայկական ինստիտուտի հիմնադիր, քաղաքական վերլուծաբան Ստյոպա Սաֆարյանը «Լրատվական» ռադիոյի եթերում:
«Կառավարության ձևավորումը ցույց է տալիս, որ ուղղակի նախընտրական խոստումների, փոփոխության խոստումների և գեղեցիկ PR-ի, կլինի դա գեղեցիկ տեսահոլովակ, թե բարետես վարչապետ, այս ամենի քողի տակ ուղղակի վերարտադրվեցին»,-կարծիք է հայտնել Միջազգային և անվտանգության հարցերի հայկական ինստիտուտի հիմնադիրը:
Ըստ նրա՝ կառավարության վերանշանակումը ցույց է տալիս, որ մենք իսկապես գտնվում ենք անցյալում, ունենք այն, ինչ ունեինք անցյալում: Ստյոպա Սաֆարյանի խոսքով՝ ունենք այն նույն պրոֆեսիոնալիզմով, մտավոր կարողություններով մարդիկ, որոնք ոչ 6 ամսվա ընթացքում են լուրջ նշան տվել, որ բան են փոխելու, ոչ էլ այժմ կարող են` 4-5 տարվա ընթացքում:
«Ինձ ահավոր մտահոգում է այն, որ մենք տեսանք միջազգային դիվանագիտության մեջ Հայաստանի խարխլված դիրքերը, որ Ադրբեջանն օգտագործեց 2016 թ. ապրիլյան պատերազմում: Ինձ մտահոգում է Հայաստանի ինքնիշխանության կրճատումը, որը տեղի ունեցավ ԵՏՄ-ին անդամակցության, նաև աշխարհի այլ ուժային կենտրոնների հետ հարաբերությունները վերասահմանելու անկարողության պայմաններում»,-հայտնել է Ստյոպա Սաֆարյանը:
Նրա կարծիքով՝ ձևավորվող իշխանությունը բացարձակապես անհամարժեք է Հայաստանի ներքին ու արտաքին մարտահրավերներին:
«Այս ամենը շարունակում է որպես մարտահրավեր մնալ, բայց այն ուժը, որը նորից ստանձնել է իշխանություն ձևավորելու իրավունքը այդ խնդիրներն իր առջև չի դրել նախկինում, չի էլ դնելու ապագայում: Ընտրողի վարքագիծը բացարձակ իռացիոնալ դաշտում է, և Հայաստան պետությունն ինքն արդեն իռացիոնալի դաշտում է»,-ընդգծել է վերլուծաբանը:
Նրան մտահոգում է այն, որ այս խորհրդարանական ընտրությունները վեր էին ածվել մրցույթի: Եթե խաղում ես ռադիկալ տրամադրությունների վրա, ապա այդտեղ պետք չէ ներկայանալ որպես աջ կամ ձախ, պետք էր ուղղակի մաքսիմալ, խիստ քննադատել, հայհոյել իշխանությանը, ինչն, ըստ վերլուծաբանի, անում էին «ՕՐՕ»-ն, «Ելք»-ը, որովհետև իրենք չունեին հստակ ընդգծված աջ կամ ձախ քաղաքական ուղղվածություն և աշխատում էին այդ դաշտում:
«Այլ քաղաքական ուժեր՝ «Ծառուկյան» դաշինքը, Հանրապետականը և այլն, աշխատում էին բացարձակապես փողի դաշտում, ով ավելի լավ և համոզիչ կառաջարկի ընտրակաշառքը: Հետևաբար այս կտրվածքով և սրա հետ միասին կար մրցույթ՝ ով ավելի գեղեցիկ կներկայանա քաղտեխնոլոգիաների ոլորտում, ընտրարշավի ձևերի առումով, գաղափարական բանավեճի համար ընդհանրապես տիրույթ չկար: Կարծես՝ մենք գլոբալ տրենդ ենք տեսնում և դա միայն ու միայն Հայաստանի խնդիրը չէ»,-վստահեցրել է Ստյոպա Սաֆարյանը: Նա կարծիք է հայտնել, որ քաղաքային, ծրագրային տիրույթի համար դաշտը մեռնում է: Մենք թևակոխում ենք պոպուլիզմի շրջան:
Մենք դա տեսանք և՛ ամերիկյան ընտրությունների օրինակով, և՛ ֆրանսիական ընտրությունների օրինակով, և՛ հայաստանյան ընտրությունների օրինակով: Հավատացնում եմ՝ նույն բանը պատմում էին և՛ Բուլղարիայից, և՛ Ռումինիայից, և՛ Մոլդովայից, և՛ Ուկրաինայից: Այսինքն՝ մենք գրեթե բոլոր տեղերում ունենք քաղաքական կյանքի էրոզիա և պատահական չէ, որ աշխարհն այսօր դարձել է այսքան վտանգավոր»,-վերլուծել է Միջազգային և անվտանգության հարցերի հայկական ինստիտուտի հիմնադիրը: