Հանքարդյունաբերությունը շրջակա միջավայրին լուրջ վնաս է հասցրել. բնապահպան (տեսանյութ)
Մարդու շրջակա միջավայրի վրա լուրջ ազդեցություն են թողնում մարդկային գործոններն ու բնակլիմայական լուրջ փոփոխությունները: Այսօր լրագրողների հետ հանդիպմանը նման տեսակետ հայտնեց բնապահպան Սիլվա Ադամյանը:
Նա տեղեկացրեց, որ այս ընթացքում ՀՀ որոշ շրջաններում լուրջ ուսումնասիրություններ են արվել, որի արդյունքում բացահայտվել է՝ հանքարդյունաբերությունը շրջակա միջավայրին լուրջ վնաս է հասցրել:
«Ուսումնասիրությունները կատարվել են Լոռու մարզում, Զանգեզուրում և Արարատյան հարթավայրում: Վերջին տվյալներով՝ շատ մտահոգիչ վիճակ է հատկապես Զանգեզուրի, Քաջարանի, Կապանի գյուղերում, որտեղ հողի, ջրի ուսումնասիրության ժամանակ հայտնաբերվել են ծանր մետաղներ: Պատճառները բոլորին հասկանալի են՝ հանքարդյունաբերողները ոչ պատշաճ ձևով են օգտագործում իրենց հնարավորությունները»,- ասաց նա:
Սիլվա Ադամյանը բնապահպանական խնդիրների հետ կապված մի օրինաչափություն է նկատել: Նա մատնացույց արեց, որ գիտական մակարդակում, հասարակական սեկտորում բնապահպանական խնդիրների մասին միշտ խոսում են, փոխարենն Առողջապահության նախարարությունը լռում է: Բնապահպանը հավելեց, որ ինքը նախարարության աշխատակիցների, ընդհուպ նախարարի հետ հանդիպում է ունեցել, իսկ աղտոտված շրջանների ցուցակը ներկայացվել է նաև վարչապետին:
«Լուրջ մտահոգություն կա նաև նրանց կողմից, սակայն ռեալ քայլեր մենք չենք տեսնում: Այն, որ մենք աշխարհի մակարդակով քաղցկեղի հիվանդացությամբ 2-րդ տեղում ենք, խոսում է նրա մասին, որ մեր շրջակա միջավայրի ուսումնասիրություններն ամբողջական ու պատշաճ չենք անում: Ես իմ աչքով եմ տեսել, որ Երևանի հիվանդանոցներում 30 հիվանդից 3-4-ն է, որ քաղցկեղով հիվանդ չէ: Երբ ես հարցնում էի, թե ո՞ր շրջաններից են, ասացին, որ ամենաշատը Գյումրիից ու Զանգեզուրից, պատճառը գիտեք՝ մենք չունենք պատշաճ հետևողական աշխատանք»,- ընդգծեց Ադամյանը:
Բնապահպանը մեջբերեց «Հայ կանայք հանուն շրջակա միջավայրի» ՀԿ-ի հետազոտության տվյալները, ըստ որոնց՝ մարդու վրա ամենամեծ ազդեցությունն ունենում է ծանր մետաղներով առատ հողն ու ջուրը, ազդում է մարդու էնդոկրին համակարգի վրա:
Ադամյանը խոսեց նաև շրջակա միջավայրի վրա ազդող կլիմայական փոփոխությունների մասին, ինչը, ըստ նրա, աշխարհում համատարած խնդիր է:
«Համաշխարհային առողջապահական կազմակերպությունն ահազանգել է այնպիսի հիվանդությունների տարածման մասին, ինչպիսին են մալարիան, խոլերան, չուման և այլն: Չենք ասում, որ սա մեզ սպասում է, բայց եթե փոփոխությունների սանդղակը մեծանա, լանդշաֆտները փոփոխվեն, փոխվի միջատների, մակաբույծների համակարգը, ապա վտանգ կլինի»,-եզրափակեց Սիլվա Ադամյանը: