Ռուսաստանցի գործարարը խոստացել է իր մասին մեմերի համար iPhone-ներ և վերնաշապիկներ բաժանել
Ռուսաստանցի գործարար Ալիշեր Ուսմանովը «ВКонтакте»-ի իր էջում շնորհակալություն է հայտնել մարդկանց, ովքեր սթիքերներ և մեմեր են ստեղծում ընդդիմադիր Աելքսեյ Նավալնիին ուղղված իր տեսաուղերձի մոտիվներով, գրում է lenta.ru-ն:
Ուսմանովը հայտարարել է, որ պատրաստ է ընտրել առավել հաջող աշխատանքները և ամեն շաբաթ հաղթողների անունները տեղադրել իր էջում: Բացի այդ, նա պատրաստ է ամենատաղանդավոր օգտատերերին նվիրել iPhone 7 Plus և վերնաշապիկներ՝ գործարարի մեմով և ինքնագրով:
«Ես շատ գնահատում եմ կատակները և հումորը, և ուրախ եմ, որ իմ տեսանյութի շնորհիվ սթիքերներ, ծաղրանկարներ, տեսահոլովակներ և մեմեր են ստեղծվել»,- ասված է հաղորդագրությունում:
Մարտի սկզբին Նավալնիի ղեկավարած կոռուպցիայի դեմ պայքարի հիմնադրամը հետաքննություն է հրապարակել երկրի վարչապետ Դմիտրի Մեդվեդևի հետ կապված հիմնադրամների մասին: Նյութի հեղինակները պնդել են, որ Մեդվեդևի համակուրսեցի Իլյա Ելիսեևը և նրա հետ կապված հիմնադրամն Ուսմանովից հողատարածք են ստացել նվիրատվության պայմանագրով: Նավալնիի թիմի կարծիքով՝ այդ գործողությունները կարելի է գնահատել որպես կաշառքի տրամադրում:
Ուսմանովը երկու տեսանյութ է ձայնագրել, որտեղ մեկնաբանել է իր հասցեին հնչած մեղադրանքները: