Վերջերս տեղի ունեցած հաքերային հարձակումներից առնվազն 150 երկիր է տուժել
Առնվազն 150 երկիր տուժել է զանգվածային հաքերային հարձակումներից, որոնց թիրախ են դարձել համակարգչային ծրագրերը: DW.com-ի փոխանցմամբ`այս մասին բրիտանական հեռուստաալիքի եթերում այսօր հայտնել է Եվրամիության ոստիկանական ծառայության` Եվրոպոլի տնօրեն Ռոբ Ուեյնռայթը:
Եվրոպոլի հաշվարկներով` զանգվածային կիբեռհարձակումներից, ընդհանուր առմամբ, ավելի քան 200 000 մարդ է տուժել, որոնց մեծ մասը բիզնեսի ներկայացուցիչներ են, այդ թվում` հսկայական ընկերությունները:
Ուեյնռայթի խոսքով` այդ տվյալները դեռևս վերջնական չեն, և տուժողների թիվը կարող է մեծանալ:
Մայիսի 12-ին հաքերային հարձակումների են ենթարկվել տարբեր կազմակերպություններ և հաստատություններ ողջ աշխարհով մեկ: Համակարգչային ծրագրերում ներդրվել է WannaCry վիրուսային ծրագիրը, որը գումար է շորթում արգելափակումից դուրս գալու համար: