Զարուհի Փոստանջյանը 4/35 ընտրատեղամասից հեռացրել է իր կուսակցության վստահված անձին
Արաբկիրի թիվ 76 դպրոցում տեղակայված 4/35 ընտրատեղամասից «Երկիր Ծիրանի» կուսակցության ղեկավար, Երևանի ավագանու թեկնածու Զարուհի Փոստանջյանը հեռացրել է կուսակցության վստահված անձին:
«Ելք» դաշինքի վստահված անձ Սոֆյա Հովսեփյանն 4/35 ընտրատեղամասում ընտրախախտումներ է նկատել, որ ուղղորդում են, օգնում են քվեարկել այն քաղաքացիներին, ովքեր ակնհայտ ունակ են ինքնուրույն քվեարկելու:
Երբ Սոֆյա Հովսեփյանը պահանջել է վերացնել խախտումները, այնտեղ գտնվող անձանցից մեկը, ով հրաժարվել է ներկայանալ, ասել է. «Նենց կգոռամ՝ թաղանթներդ կտրաքի»:
Վստահված անձի խոսքով, երբ փորձել է խախտումը գրանցել, նրան խոչընդոտել է նաև «Երկիր Ծիրանի»-ի վստահված անձը. «Նա չի աշխատում «Երկիր Ծիրանի»-ի օգտին, այլ աշխատում է բացառապես ՀՀԿ-ի օգտին»:
Սոֆյա Հովսեփյանի ահազանգից հետո նշված ընտրատեղամաս է ժամանել Զարուհի Փոստանջյանը, ով տեղում հեռացրել է իր կուսակցության վստահված անձին:
Վստահված անձն ասել է, թե ինքը խախտում չի արել:
«Առաջիկայում կպարզենք: Եթե եղել է խախտում, ապա այդ անձը կպատժվի, իսկ եթե ոչ՝ ներողություն կխնդրենք»,-ասել է Փոստանջյանը: