Ֆիզիկայի ուսուցչից՝ 400 000 դրամ, մաթեմատիկայի ուսուցչից՝ 637 000 դրամ, մանկավարժության ուսուցչից՝ 617 000 դրամ կաշառք.Նոր Կյանքի դպրոցի տնօրենին կաշառել են
Արարատի մարզի Նոր Կյանք համայնքի դպրոցի տնօրեն Արամ Ստեփանյանին կաշառք տալու համար մեղադրանք է առաջադրվել համայնքի երեք բնակչի: Գործն ուղարկվել է Վեդիի դատարան և մակագրվել դատավոր Լևոն Արազյանին:
Սամվել Գրիգորյանին մեղադրանք է առաջադրվել այն բանի համար, որ նա Օֆելյա Մուրադյանի կազմակերպմամբ և անձամբ տնօրեն Արամ Ստեփանյանին տվել է 400.000 ՀՀ դրամ կաշառք՝ իր՝ ֆիզիկայի ուսուցչուհու որակավորում ունեցող դստերը՝ Նազիկ Գրիգորյանին Արարատի մարզի հանրակրթական դպրոցներից մեկում, որպես տարրական դասարանների ուսուցչուհի, աշխատանքի տեղավորելու համար:
2014թ. օգոստոսի 10-ին նրա հետ այցելել է Արարատի մարզպետարան, որտեղ հանդիպելով իր ծանոթ՝ մարզպետարանի աշխատակազմի կրթության, մշակույթի և սպորտի վարչության գլխավոր մասնագետ Օֆելյա Մուրադյանին՝ հայտնել է դստերն աշխատանքի տեղավորելու մտադրության մասին: Օֆելյա Մուրադյանը խոստացել է օգնել Նազիկ Գրիգորյանին: Ի դեպ, դպրոցի տնօրենը նրա որդին է:
2014 թվականին Սամվել Գրիգորյանն ինչպես Օֆելյա Մուրադյանի միջոցով, այնպես էլ անձամբ Արամ Ստեփանյանին մաս-մաս տվել է պահանջված՝ ընդհանուր խոշոր չափերով՝ 400.000 ՀՀ դրամ կաշառքը:
Մեկ այլ բնակիչ՝ Սամվել Բադալյանին մեղադրանք է առաջադրվել այն բանի համար, որ նա Արամ Ստեփանյանին անձամբ տվել է խոշոր չափերով՝ 637.000 ՀՀ դրամ կաշառք՝ իր մաթեմատիկայի ուսուցչուհու որակավորում ունեցող դստերը՝ Վարդուհի Բադալյանին Արարատի մարզի Նոր Կյանք գյուղի միջնակարգ դպրոցում, որպես տարրական դասարանների ուսուցչուհի, աշխատանքի տեղավորելու նպատակով:
Նույն համայնքի մեկ այլ բնակչուհու՝ Գայանե Հովհաննիսյանին մեղադրանք է առաջադրվել այն բանի համար, որ նա Տիգրան Ասատրյանի միջնորդությամբ և Օֆելյա Մուրադյանի կազմակերպմամբ պաշտոնատար անձ հանդիսացող՝ Նոր Կյանքի դպրոցի տնօրեն Արամ Ստեփանյանին տվել է խոշոր չափերով՝ 616.845 ՀՀ դրամին համարժեք 1.500 ԱՄՆ դոլար կաշառք՝ իր՝ «Մանկավարժություն և մեթոդիկա» ուսուցչի որակավորում ունեցող դստերը՝ Գոհարիկ Բադալյանին, Արարատի մարզի հանրակրթական դպրոցներից մեկում, որպես տարրական դասարանների ուսուցչուհի, աշխատանքի տեղավորելու հարցում իրեն օգնելու խնդրանքով:
Նրանց բոլորին մեղադրանք է առաջադրվել ՀՀ քրեական օրենսգրքի 312-րդ հոդվածի 2-րդ մասի հատկանիշներով՝ կաշառք տալը, որը կատարվել է խոշոր չափերով՝ պատժվում է տուգանքով՝ նվազագույն աշխատավարձի երկուհարյուրապատիկից չորսհարյուրապատիկի չափով, կամ ազատազրկմամբ՝ երկուսից հինգ տարի ժամկետով: