Աշխարհի ամենափոքր փոխադրող հրթիռն ընկել է մեկնարկից հետո
Հունվարի 15-ին անհաջողությամբ է պսակվել Ճապոնիայում արտադրված և արբանյակով հագեցած SS-520 փոխադրող հրթիռի մեկնարկը. այս մասին հաղորդում է NHK հեռուստաալիքը`հղում անելով երկրի աէրոտիեզերական գործակալությանը:
Ինչպես պարզաբանել են JAXA-ի մասնագետները` իրենք ստիպված են եղել ընդհատել աշխարհի ամենափոքր փոխադրող հրթիռի թռիչքը տեխնիկական անսարքությունների պատճառով: Նրանց խոսքով` մեկնարկից որոշ ժամանակ անց իրենք տվյալներ չեն ստացել փոխադրող հրթիռի վիճակի մասին: Արդյունքում՝ տիեզերական ապարատն ու դրա արբանյակը ընկել են ծովը:
Նշվում է, որ փոխադրող հրթիռի երկարությունը կազմում է 9,5 մետր, իսկ քաշը` 2,6 տոննա: Արբանյակի քաշը կազմում է 3 կիլոգրամ, իսկ երկարությունը կազմում է 35 սանտիմետր: Սարքավորման մշակման աշխատանքների և մեկնարկի վրա ծախսվել է 400 միլիոն իեն (մոտ 3,47 միլիոն դոլար):