Հայաստանի սնունդը համեղ է, բայց ճանապարհների ու զուգարանների հարցը լուրջ է. մարքեթոլոգ
«Մարքեթինգի հայկական ասոցիացիա» հասարակական կազմակերպության նախագահ Արամ Նավասարդյանի կարծիքով՝ «National Geographic» հեղինակավոր ամսագրի կողմից համեղ ուտեստների սիրահարների լավագույն վեցնյակում Երևանի ընդգրկումը այն գործոնն է, որը շատ երկրներ ստիպված են լինում հորինել իրենց երկիրը տուրիզմի առումով գրավիչ դարձնելու համար:
«Յուրաքանչյուր նման հետաքրքիր և գրավիչ նորություն ու փաստ Հայաստանի մասին պետք է հնարավորինս տարածել, դա պետք է օգտագործեն տուրիստական ընկերությունները` պոտենցիալ տուրիստներին որպես հետաքրքիր ուղղություն` Հայաստան ներգրավելու համար: Եվ «National Geographic»-ի այս հոդվածը շատ լավ հնարավորություն է, որպեսզի պատկան մարմինները և մասնավոր ընկերություններն այս դրական «մեսիջն» օգտագործեն»,- ասաց Արամ Նավասարդյանը:
Հարցին, թե հաշվի առնելով, որ կան տուրիզմի տարբեր ուղղություններ` կրոնական, էքստրեմալ և այլն, կարելի՞ է ասել, որ կան նաև «գուրմանների տուրեր» և Հայաստանը կարող է նրանց համար գրավիչ դառնալ, մարքեթոլոգը դրական պատասխան տվեց:
Արամ Նավասարդյանի դրական գնահատականները վերաբերում էին նաև սրճարանների սպասարկման որակին:
Սակայն, ըստ մարքեթոլոգի, դրանից հետո արդեն սկսվում են թերությունները, որոնք դեռ շատ-շատ են՝ հատկապես ենթակառուցվածքների, հասարակական զուգարանների ու ճանապարհների առումով:
«Հասարակ բան՝ լվացվելու կամ հասարակական զուգարանների առկայությունը ծառայություն է, և բոլորս էլ գիտենք, որ շատ վատ վիճակում է»,- ասաց Արամ Նավասարդյանը:
Նա մի քանի օր առաջ է իրենց այցելած արտասահմանյան զբոսաշրջիկներին մեքենայով տարել Հայաստանի ամենատարածված ուղղություններից մեկը` Գառնի Գեղարդ։ Պատմեց, որ արտասահմանցիները զարմացած են եղել, թե ինչու են այսքան մարդաշատ և այցելություններ ունեցող վայր տանող ճանապարհները նման անմխիթար վիճակում: