Մարտին Շուլցը հրաժարվել է սոցիալ-դեմոկրատների կողմից Գերմանիայի կանցլերի թեկնածու դառնալ. Der Spiegel
Եվրախորհրդարանի սոցիալ-դեմոկրատ նախագահ Մարտին Շուլցը հասկացրել է իր կուսակիցներին, որ նրանք չեն կարող հույսը դնել իր վրա որպես 2017 թվականի աշնանը կայանալիք խորհրդարանական ընտրություններում Գերմանիայի կանցլերի պաշտոնի թեկնածու: Այդ մասին գրում է Der Spiegel-ը:
Այսուհետ որոշումը, թե ով կդառնա Գերմանիայի սոցիալ-դեմոկրատական կուսակցությունից թեկնածու, մնում է փաստացիորեն կուսակցության ղեկավար Զիգմար Գաբրիելին: Կուսակցության շատ անդամներ վստահ էին, որ Եվրախորհրդարանի ներկայիս նախագահն արժանի մրցակից կդառնա Անգելա Մերկելին կանցլերի պաշտոնի համար մրցապայքարում, և այդ պատճառով փորձում էին համոզել Շուլցին հայտարարել թեկնածու դառնալու պատրաստակամության մասին:
Ավելի վաղ Գաբրիելը, ով որպես կուսակցության առաջնորդ կանցլերի «տրամաբանական» թեկնածուն է, հայտարարել է, որ մի քանի թեկնածուի առկայության դեպքում ընտրություններ կանցկացնի: Շուլցն այդ դեպքում ակնհայտ ֆավորիտ կլիներ:
Թերթի տեղեկություններով՝ ակնհայտ է, որ Եվրախորհրդարանի նախագահը վախեցել է իր թեկնածությունն առաջադրել և բաց պայքարի մեջ մտնել Գաբրիելի հետ:
Պաշտոնապես Գերմանիայի սոցիալ-դեմոկրատական կուսակցությունը կհայտարարի իր թեկնածուի անունը հունվարի երկրորդ կեսին:
Ավելի վաղ չորրորդ ժամկետի համար առաջադրվելու պատրաստակամության մասին հայտարարել է Գերմանիայի կանցլեր Անգելա Մերկելը: