Թուրքիայում ՔԱԿ-ի 5 բարձրաստիճան անդամ է ձերբակալվել
Թուրքիայի տարբեր քաղաքներում այսօր ձերբակալվել է «Քուրդիստանի աշխատավորական կուսակցություն» խմբավորման 5 բարձրաստիճան անդամ:
Ինչպես հայտնում է թուրքական «Անադոլու» գործակալությունը` թուրքական ոստիկանության հատուկջոկատայինները նրանցից երեքին հայտնաբերել և ձերբակալել են Դիարբեքիր քաղաքում, մյուս երկուսը ձերբակալվել են Անթալիայում և Ուրֆայում:
Թուրքական ԶԼՄ-ների պնդմամբ` ձերբակալվածներից 45-ամյա Է.Ա.-ն համարվում է ՔԱԿ-ի մի ճյուղը համարվող «Քուրդիստանի համայնքների միություն» խմբավորման Դիարբեքիրի թևի պատասխանատուն:
ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը:
Կազմակերպությունը 1978 թվականին հիմնադրել է Աբդուլլահ Օջալանը, ով ներկայում ցմահ ազատազրկում է կրում թուրքական Իմրալը կղզու բանտում, սակայն շարունակում է համարվել կազմակերպության ղեկավարը։