Տարօրինակ է, որ Վանաձորի քաղաքապետարանի մի շարք աշխատակիցներ միաժամանակ «ինքնակամ» ազատման դիմումներ են գրել. Քրիստ Մարուքյան
Տեղեկություններ են տարածվել, որ Վանաձորի համայնքային ծառայողներին պարտադրում են աշխատանքից «ինքնակամ» ազատման դիմումներ գրել և մարդկանց փորձում ապօրինի կերպով ազատել աշխատանքից՝ տարբեր մերձավորների փորձելով տեղավորել աշխատանքի։
Այս մասին հայտնում է Վանաձորի ավագանու «Լուսավոր Հայաստան» խմբակցության ղեկավար Քրիստ Մարուքյանը, որը Tert.am-ի հետ զրույցում մանրամասնեց, որ իրենք պատրաստ են սատարել և իրավական հարթությունում օգնություն տրամադրել ապօրինի կերպով աշխատանքից ազատված անձանց, սակայն առայժմ որևէ մեկն իրենց չի դիմել։
«Համայնքային ծառայողը օրենքով պաշտպանված է և նրանց աշխատանքից ազատելու համար ռեալ հիմքեր են պետք, իսկ իրենց դիմումների հիման վրա, բնականաբար, հետագայում, եթե հարց լինի, կասեն՝ մարդը դիմում է գրել և աշխատանքից ազատվել է իր դիմումի համաձայն և որևէ մեկին այդ պարագայում չենք կարող մեղադրել: Հիմա հարցն այն է, թե նրանցից ովքեր պատրաստ կլինեն իրենց իրավունքները պաշտպանել և ինչ մեթոդներով»,- հավելեց Մարուքյանը:
Մարուքյանի համար տարօրինակ է այն փաստը, որ բազմաթիվ աշխատողներ միաժամանակ են ներկայացրել իրենց ազատման դիմումները:
Tert.am-ը փորձեց նաև զրուցել Վանաձորի քաղաքապետ Մամիկոն Ասլանյանի հետ, սակայն մեր հեռախոսազանգերն անպատասխան մնացին: