Իրաքի զինվորականները հայտնել են, որ ԻՊ-ի առաջնորդը Մոսուլի տարածքում է
«Իսլամական պետություն» ահաբեկչական խմբավորման առաջնորդ Աբու Բաքր ալ Բաղդադին Իրաքում է՝ Մոսուլի տարածքում, հայտնում է Rudaw գործակալությունը՝ վկայակոչելով իրաքցի զինվորականներից ստացած տեղեկատվությունը:
«Համարվում է, որ ԻՊ առաջնորդ Աբու Բաքր ալ Բաղդադին Մոսուլում է»,- ասված է հաղորդագրությունում:
Ավելի վաղ հաղորդվել էր, որ Ալ Բաղդադին կոչ է արել գրոհայիններին չնահանջել Մոսուլից: Ալ Բաղդադին մասնավորապես Մոսուլի բնակիչներին կոչ էր արել պայքարել «թշնամիների դեմ», իսկ ԻՊ գրոհայիններին՝ «անհավատների համար գիշերը ցերեկ դարձնել, նրանց հողերում քաոս ստեղծել ու այնպես անել, որ նրանց արյունը գետերով հոսի»: Նշվում է, որ ուղերձն Ալ Բաղդադիի առաջին հայտարարությունն է հոկտեմբերի 17-ին իրաքյան կառավարական բանակի, քրդական զորամիավորումների և ԱՄՆ-ի գլխավորած միջազգային կոալիցիայի համատեղ ջանքերով Մոսուլի ազատագրմանն ուղղված լայնամասշտաբ գործողության մեկնարկից ի վեր: