Պետք է նվազեցնել ՃՈ տուգանքների չափը. Միքայել Մելքումյան
ԱԺ «Բարգավաճ Հայաստան» խմբակցության պատգամավոր Միքայել Մելքումյանը Tert.am-ի հետ զրուցում նշեց, որ երթևեկության հսկիչ համակարգի ֆինանսական հոսքերի և ավտոկայանատեղիների համար գանձվող գումարների կառավարումը մասնավոր ընկերություններից պետությանը փոխանցելը արվում է հանրային դժգոհությունները փարատելու համար:
Նշենք, որ երեկ Նախագահ Սերժ Սարգսյանը հանձնարարել էր ՀՀ ոստիկանության պետին և առաջարկել Երևանի քաղաքապետին՝ «Սեքյուրիթի դրիմ» ՍՊԸ և «Փարկինգ Սիթի Սերվիս» ու «Լոկատոր» ՓԲԸ կոնսորցիումի հետ բանակցությունների արդյունքում 10-օրյա ժամկետում համապատասխան իրավական մեխանիզմներ մշակել, որ այս ընկերությունների ֆինանսական հոսքերի տնօրինումն ու կառավարումն անցնեն պետական և համայնքային կառույցներին:
«Այսինք՝ այն բիզնես օպերատորները, որ այդ ծառայությունները մատուցելու համար ծախսեր են կատարել , արդեն հետ են ստացել իրենց ներդրած գումարը, և մեծ են շահույթները։ Պետությունն էլ հասկացավ, որ հիմա արդեն ժամանակն է, որ հանրային դժգոհությունները փարատի, և արդեն այդ ֆինանսական հոսքերն ուղղվեն մի մասով բյուջե»,- մանրամասնեց Մելքումյանը:
Միքայել Մելքումյանը նաև նշեց, որ սոցիալական բեռը մեղմելու համար անհրաժեշտ է նվազեցնել տուգանքների չափը՝ հաշվի առնելով նաև աշխատավարձերի սանդղակը: