Երևանում հաշվեգրված 4 651 վերելակների գերակշիռ մասն անհանգստացնող վիճակում է. Երևանի փոխքաղաքապետ
Երևանում հաշվեգրված է 4 651 վերելակ, որոնց գերակշիռ մասն անհանգստացնող վիճակում է. ԱԺ-ում լրագրողների հետ զրույցում ասաց Երևանի փոխքաղաքապետ Կամո Արեյանը: Ըստ նրա՝ շուրջ 5000 շենք Երևանում խորհրդային ժամանակների է, մյուսները նորակառույց են և նոր վերելակներով կահավորված:
Կամո Արեյանի խոսքով՝ վերելակների վերանորոգման հարցով քաղաքապետարանը զբաղվում է և օրենսդրական նախաձեռնությամբ են փորձում հանդես գալ, որ շահառուներից ստանան հաստատված վճար, որպեսզի ներդրողներին հետաքրքրի՝ ապահով վերելակներով կահավորեն:
«Աղբի խնդիրը լուծվեց, քանի որ օրենսդրորեն երաշխավորված վիճակ ստեղծեցինք, հիմա պետք է վերելակների հարցով էլ նախաձեռնել նոր օրենսդրական նախաձեռնություն, որ լինի պարտադիր վճար, որպեսզի երաշխավորված լինի շահագործման և պահպանման համար վճարի և՛ գանձումը, և՛ ուղղորդումը: Հիմա ակտիվ բանակցային գործընթացի մեջ ենք, որպեսզի ցանկացած ներդրող տեսնի ֆինանսական մեխանիզմների երաշխիք, որ կարող է այդ ծրագիրը իրականացնել արդյունավետ ու ապահով»,-ասաց նա:
Արեյանը ասաց, որ քննարկումներ են սկսել տարբեր կառույցների հետ՝ վերելակային տնտեսության թարմացման հարցով:
Ըստ փոխքաղաքապետի՝ վերելակների տարիքը տարբեր շենքերում շատ մեծ է, տեխնիկական վիճակը տարբեր է: «Գերակշիռ մասն անհանգստացնող է»,-ասաց նա և նշեց, թե ամենօրյա հետևողականություն կա, բայց տեխնիկապես բարոյապես արդեն մաշված են:
Միաժամանակ փոխքաղաքապետը ասաց, որ ծախսեր չեն հաշվարկել, քանի որ տարբեր գներ են, խիստ տատանվում են: «Հիմա ինտենսիվ բանակցային գործընթացի մեջ ենք այն ընկերությունների հետ, որոնք ցանկանում են արտադրություն ստեղծել կամ ներկրել»,-ասաց նա: